Corina Mañá mergúllase na arte mariñeira da Costa da Morte en “Coa luz do corazón”

Unha das raíces da cultura popular galega está nas ondas do mar, que son traballadas na nosa costa con formas propias que singularizan a Galicia no mundo. No “Coa luz do corazón” de hoxe na TVG (19.45 horas), a moza cega Corina Mañá quere tocar coas súas mans e co seu corazón a cultura mariñeira. E percibir os seus sons. O espazo viaxa a Camariñas, na Costa da Morte, ao encontro dunha muller moi especial nacida neste porto: Yaqui Lista, mariscadora e mariñeira.

Yaqui mostraralle a Corina unha arte que singulariza a Costa da Morte e que ten a súa expresión máis coñecida en Camariñas: os encaixes de palillos. Dúas palilleiras, María Isabel Pasantes e Josefina Lista, esta última irmá de Yaqui, aprenderanlle a palillar a Corina.

Para esta é unha arte descoñecida, pero coas explicacións de Yaqui, Isabel e Josefina, axiña comprende como se desenvolve esta arte, e a pesar da súa dificultade, e a maior complexidade para Corina pola súa cegueira, en poucos minutos é quen de tecer cos palillos, como unha principiante, claro, no vai ser de súpeto unha experta. Pero a habilidade de Corina sorprende grandemente ás tres palilleiras de Camariñas. Esta habilidade da xoven nace do seu inmenso interese en querer saber de todo e en demostrar que a cegueira non é un impedimento para nada que ela se propoña facer.

Despois da experiencia do palillo, Corina vai con Yaqui embarcar no seu barco do que é patrón Tono Pasantes, o home desta. O dous traballan xuntos no mar. Corina, e o presentador do programa X. H. Rivadulla Corcón, embarcan e entre Tono e Yaqui ensínanlle as diferentes partes do barco a Corina.

No mar van recoller unhas nasas do polbo que teñen largadas. O día ponse mal, levantase o vento e o mar está bravo. Para Corina é unha situación totalmente nova, pois nunca embarcara nun pesqueiro e moito menos co mar nese estado. Corina percibe o perigo, pero sabe manter a calma, e incluso goza coa situación, vivindo o que os mariñeiros coñecen, coa dificultade do seu traballo, a dureza da súa vida.

O programa remata cunha entrevista do presentador X. H. Rivadulla Corcón a Corina, onde conta como viviu a experiencia dun día facendo o traballo nun pesqueiro.