Máis de 1.750 nenos de todas as idades participaron nos obradoiros organizados por FCC, empresa concesionaria do servizo de limpeza na cidade, e nos que Dinoseto foi unha vez máis protagonista dunha iniciativa que ten por obxectivo concienciar aos máis pequenos da importancia de reciclar, separando os residuos e depositándoos nos colectores correspondentes.
A campaña desenvolveuse durante xullo e agosto nos campamentos do Concello de Vigo e que abrangue aos de "Verán na praia de Samil", "Verán na praia de Alcabre", "Verán ecolóxico en Navia", "Verán artístico", "Verán multideportivo", "Verán na Casa da Xuventude", "Verán en Coia" e "Campamento urbano nas Travesas". Ademais, os obradoiros celebráronse no marco dos campamentos "Verán de lecer" para persoas con discapacidade. Esta actividade foi desenvolvida por FCC en colaboración con Contenur no marco de Vigo Recicla.
Nos obradoiros, de dúas horas de duración, o Dinoseto acudíu aos campamentos a bordo dunha unidade móbil que se converte en escenario e no que realiza unha representación teatral na que interactúa cos máis pequenos para que aprendan a importancia de Reducir, Reutilizar e Reciclar. Nesta obra de teatro, Dinoseto amosa aos rapaces como se fai unha boa separación para contribuír á conservación do medio ambiente. Os nenos tamén traballan con material de refugallo supervisados polos monitores.