A Deputación de Pontevedra sorprendeu en Fitur cun canto á “Orixe” das Rías Baixas

Almillas, zocos, pendentes das colareiras do Grove, sapos artesanais, estameñas únicas e a cor da flor do toxo. Todo iso “que tanto fala de nós”, de Pontevedra, converteuse no gran protagonista de Fitur 2023 este xoves durante o lanzamento da campaña “Orixe Rías Baixas. Un ano e mil ocasións para celebrar a provincia de Pontevedra”, ante un cheo absoluto no stand de Tourespaña, que contou tamén coa presenza da Secretaria de Estado de Turismo, Rosana Murillo. 

O estreo de dous impresionantes vídeos cos que a Deputación de Pontevedra promoverá o destino durante o 2023 supuxo así un gran convite para “achegarse e gozar das mil ocasións para celebrar a provincia de Pontevedra” e unha rotunda declaración de orgullo “do legado dunha provincia que atesoura tradicións únicas, milenarias, que se reinterpretan dende a modernidade”.

Máis “orixe” ca nunca entón no stand de Turespaña, vestido para a ocasión con elementos tradicionais senlleiros e representativos da provincia. Alí estiveron a presidenta Carmela Silva e a artista multidisciplinar Julia de Castro, encargadas de conducir o acto de presentación, así como a deputada de Turismo, Ana Laura Iglesias. Todas elas levaron roupas, complementos e calzados artesanais como xesto de compromiso coas tradicións e coas pequenas empresas do sector téxtil da provincia porque “iso somos as Rías Baixas”.

Deste xeito, a presentación pasou a ser unha experiencia en sí mesma para amosar “o orgullo de pertencer a unha terra ancestral na que desfrutar de vivencias, culturas e tradicións únicas no mundo”, en palabras da propia Carmela Silva, que vestiu unha antiga almilla, chaqueta tradicional bordada, adaptada a corte feminino, na cor da chorima ou alecrín (flor do toxo); zocos da Premio Nacional de Artesanía Elena Ferro e pendentes das colareiras do Grove, en concreto da artesá Montse Betanzos, amais dun colar de sapo seguindo a tradición galega, entre outros. 

Os vídeos “Orixe” e “Carboeiro”, chaves da campaña

Baixo o lema “Orixe Rías Baixas. Un ano e mil ocasións para celebrar a provincia de Pontevedra”, a presidenta chegaba deste xeito coa intención de ir a por todas este 2023: “Queremos que a xente mire cara nós, sorprendela, chamar a súa atención, facer que desexe con todas as súas forzas vir á provincia a vivir a “Orixe”, as nosas xentes, a nosa historia, todo aquilo que fomos capaces de construír ao longo de centos de anos e que hoxe nos trouxo ata aquí e fai que sexamos unha sociedade tan avanzada, tan auténtica e única”. 

Poderíase dicir que se cumpriu con creces da man dun acto espectacular no que non faltaron a emoción, as sensacións e as sorpresas.

Dous foron os vídeos encargados de chamar a atención do público: Orixe, o audiovisual principal da campaña, e o elaborado en Carboeiro coa participación de “Nova Danza Galega”. 

O primeiro, unha peza elaborada por Esmerarte e baseada nas persoas, na nosa xente, contou con Xulia de Castro como protagonista principal para sumerxir aos presentes nunha apaixoante viaxe polas tradicións e a forma de vivir, de sentir, de Pontevedra, invitando a conectar coa riqueza etnográfica e a marcada identidade local da Provincia. 

Cantos, oficios tradicionais, celebracións, festas de interese turístico, patrimonio inmaterial, rituais case milenarios e unha potente transmisión oral mesturáronse nun vídeo no que se pudo ver a Elena Ferro, Josefa Ferro, Vanesa Quintela e Sara González, zoqueiras de Elena Ferro. Tamén a Manuel González Ferradás “Purro”, Valentín Otero, Antía Santos e Anxo Estévez, da Asociación de embarcacións tradicionais Os Galos; Manuel Presas, do Museo FAVUM, Lagar da cera; María Mercedes Lomba, argaceira da Guarda; Montse Betanzos, colareira do Grove; Meira Paz, José Sousa, Fiz Axeitos e Xacobe Cabrera, da Asociación Etnográfica A Merdeira; Dolores Rodríguez, Lealdina Amira, Joaquina Fernández, Alegría Busto, Maneul Barbosa, Dalmiro Fernández, de Pandereteiras de Gargamala; e Romina Casal, Henar Lameiro e José Manuel Souto, da Asociación Cultural Cobres-Entroido de Cobres.  

Unha campaña que serviu para visibilizar coma “o territorio marca profundamente a nosa cultura e personalidade, facendo unha homenaxe ao que fomos, ao que somos e ao que seremos, conectando co máis íntimo de nós” e que contou cun final sorprendente, complementado coa entrega dun agasallo “boutique”: un caderno de viaxe con propostas de calendario e imaxes dos eventos máis importantes que se desenvolven na provincia de Pontevedra.