Coñeces o contedor marrón? Dálle unha nova vida á materia orgánica

Sabías que a metade dos residuos xerados nos fogares que se levan ao contedor do lixo son materia orgánica? Trátase dun recurso ao que se lle pode dar unha segunda vida, reutilizándoo como abono, e contribuíndo así á circularidade.

Reducir a xeración de residuos e fomentar a reutilización, a reciclaxe e a separación para a mellora das recollidas selectivas constitúe un xesto moi importante co que cada cidadán pode contribuír a crear contornas en hábitats máis sostibles.

Por este motivo, o Concello de Vigo e FCC- empresa concesionaria do servizo de recollida de lixos e limpeza na cidade- poñen os recursos necesarios para favorecer a recollida desta materia orgánica.

Coñeces os contedores marróns? Seguro que os vistes por diferentes rúas da cidade. Son precisamente estes contedores nos que os vigueses e viguesas poden depositar os restos de froita, verduras, carne, peixe, cunchas de mariscos, pan, cascas de ovos, osos...etc. Ata papel de cociña sen tintes, restos de plantas ou tapóns de cortiza son residuos susceptibles de converterse en compost, un abono natural rico en substancias minerais que se poden empregar na terra para aumentar a súa fertilidade, axudando a reducir a contaminación por fertilizantes químicos e a paliar o quecemento global.

O seu funcionamento é sinxelo, soamente implica tres pasos:

• O primeiro, e máis importante, deberás levalo a cabo na casa, separando a materia orgánica do resto de residuos.
• Idealmente, necesitarás bolsas compostables, podes empregar as que están dispoñibles coa froita nos supermercados.
• Xa por último, podes depositar as bolsas no contedor marrón, que dispón dun sistema de apertura con tecnoloxía contactless, que permite un acceso mais sinxelo que co antigo pedal e garante o seu correcto uso. En concreto, o colector ábrese coa tarxeta PassVigo, a mesma que empregas no servizo de autobuses. So tés que aproximala ao contedor, escoitarás un son e verás que se acende unha luz verde. Este é o sinal de que xa podes levantar a tapa e contribuír con teu xesto a seguir facendo de Vigo a cidade máis limpa de España.