Cun "abarrote" total no mercado de Santiago de Compostela, finalizou hoxe o percorrido promocional posto en marcha polo Concello de Lalín por seis das principais e máis coñecidas prazas de abastos do país (as outras eran Pontevedra, Vilagarcía, Vigo, A Coruñ e Lugo), onde nas últimas semanas se realizou unha presentación da 51ª Feira do Cocido co patrocinio de Gadis e coa colaboración de Abanca e Coren. Na mañá de hoxe, o posto instalado no emblemático mercado compostelán estivo completamente ateigado pola presenza constante de santiagueses e turistas que non quixeron pasar a oportunidade de gozar do plato lalinense na derradeira parada do itinerario promocional. As máis de 200 tapas baseadas no auténtico cocido de Lalín e elaboradas neste caso polo coñecido cociñeiro local, Diego López, rematáronse en pouco tempo deixando constancia entre os presentes da enorme calidade dos produtos locais e do enorme potencial da súa hostalería e dos novos valores da cociña lalinense. O alcalde de Lalín, Rafael Cuíña, acudiu ao acto acompañado do concelleiro de Turismo, Francisco Vilariño, aproveitando ambos para convidar a todos e todas as santiaguesas a visitar Lalín o vindeiro 24 de febreiro no día grande da Feira do Cocido.
Tanto o alcalde como o concelleiro fixeron nesta última parada promocional un balance moi positivo da iniciativa do Concello para difundir a 51ª Feira do Cocido polas principais prazas de abastos galegas. Ambos puxeron de relevo a enorme cantidade de cidadáns que ao longo do percorrido pasaron polo stand para degustar as tapas e para informarse sobre os actos e o evento gastronómico. Así mesmo, destacaron a ampla cobertura mediática que tiveron os distintos actos. En definitiva -indicaron- estamos moi satisfeitos dos magníficos resultados que tivo a campaña promocional e moi contentos da excelente resposta que obtivo por parte da cidadanía. A idea, explicaron, ademais de servir para atraer visitantes a Lalín e á feira tamén serviu para poñer en valor o papel fundamental que xogan os mercados de abastos como exemplo de comercio de proximidade e de produto de calidade e para dar a coñecer as excelentes materias primas de Lalín. Tendo en conta, ademais, a estreitísima relación que garda o Cocido de Lalín con algúns dos produtos galegos máis recoñecidos pola súa calidade, e que todos eles se poden atopar nas prazas, esta modalidade promocional adaptouse ao 100% ao que buscamos transmitir e permitiunos superar con creces os obxectivos de difusión da feira e de Lalín, aseguraron Cuíña e Vilariño.
