Añádenos en GoogleLeonor Watling proba co galego da man de Santi Araújo (e con cameo de Xoel López)
Na polifacética folla de servizos de Leonor Watling non estaba o uso do galego. Ata agora. A actriz e cantante aceptou o convite de Santi Araújo para cantar a dúo 'Miña Rula / Non Teñas Medo', unha delicada e luminosa nana (inda que o vídeo estea en branco e negro) que supón o terceiro e último adianto de Suelta Ø Muerde. O segundo disco do compositor de Ponteareas, continuación de Catedral, publícase o próximo 22 de febreiro.
"É fascinante que unha nana que me saíu de súpeto, xogando no sofá, cantándolla a outra persoa, poida acabar na voz de Leonor Watling", explica Araújo. A canción, "unha desas que saen directamente do subconsciente", propón un diálogo íntimo entre ambos artistas, con protagonismo para a maxia que se agocha baixo as dunas de Corrubedo.
O vídeo, coma os anteriores adiantos do disco —'Esqueleto / Óyeme' e 'Ser Mi Amigo / Estar Conmigo'—, está dirixido por Xaime Miranda e rodado nun elegante branco e negro. Conta coa participación de Xoel López, o músico, onda Jorge Drexler, que con máis frecuencia se cita para referenciar a actual etapa creativa de Santi Araújo. Inda que, se se fala só de estética, o ponteareán cada vez vaise parecendo máis a George Harrison.
