O Concello de Baiona en colaboración coa Asociación de Familiares de Enfermos de Alzhéimer e outras demencias de Galicia (Afaga) está impartindo obradoiros para desenvolver a estimulación cognitiva e funcional, ao mesmo tempo que se proporciona apoio aos familiares coidadores.
Un programa de estimulación terapéutica para persoas maiores con necesidades específicas é do que están a participar diversos veciños de Baiona. O Concello e a Asociación de Familiares de Enfermos de Alzhéimer e outras demencias de Galicia (Afaga) levan a cabo esta iniciativa co obxectivo de desenvolver a estimulación cognitiva e funcional, ao mesmo tempo que se proporciona apoio aos familiares coidadores.
Os obradoiros celébranse os luns e venres nas instalacións do edificio multiusos Ángel Bedriñana, no número 9 da rúa Carabela Pinta, en horario de mañá, de 10.30 a 13.00 horas. Así, aquelas persoas interesadas en participar poden inscribirse, ata completar aforo, chamando ao número de teléfono 986 385 926, entre as 09.00 e as 14.00 horas.
Despois do diagnóstico dunha demencia neurodexenerativa, a persoa comeza un camiño onde estimular as súas capacidades, significa manter a súa autonomía por máis tempo. Por iso, Afaga desenvolve o programa de talleres de estimulación cognitivo-funcional, co que se pretende manter as habilidades, os coñecementos e as condutas que aínda posúen, empregando para iso técnicas dirixidas ao adestramento nas actividades da vida diaria, orientación á realidade, estimulación cognitiva e estimulación funcional. Todo elo se concreta realizando actividades adaptadas, tanto ás capacidades xenerais do grupo, como ás que se presenten de forma individual.
O alcalde de Baiona, Carlos Gómez, destaca “o compromiso do Concello en proporcionar recursos a nosa poboación e dar continuidade aos programas, sendo unha resposta dos dereitos que a cidadanía demanda”.
Cultiva a túa mente
Por outra banda, dende o Departamento de Servizos Sociais, dáselle continuidade ao programa Cultiva a túa mente iniciado en 2019, cunha acollida elevada y que se consolidou o pasado ano. Agora en 2021 vólvese a impartir, todos os luns e martes de 17.00 a 19.00 horas no multiusos Ángel Bedriñana.
O programa está dirixido a persoas maiores de 55 anos interesadas no desenvolvemento activo e participativo, promovendo hábitos de vida saudables, mantendo un rol que facilita unhas mellores relacións sociais, a prevención da soidade, así como a independencia e a autonomía persoal.
O período de inscrición para participar nestes obradoiros permanece aberto ata completar a capacidade. Así, as persoas interesadas deben chamar, igualmente, ao número de teléfono 986 385 926, entre as 09.00 e as 14.00 horas
