Un total de 40 veciños integrantes do plan municipal de compostaxe doméstica participaron no ciclo formativo para uso de biotrituradoras de residuos agrícolas organizado polo Concello de Soutomaior.
O curso tiña como obxectivo instruír aos participantes nos conceptos básicos do manexo e mantemento destas máquinas, prestando especial atención ao proceso de acendido, aos compoñentes que integran a ferramenta e ao tipo e tamaño dos restos vexetais que se poden triturar.
Os participantes poden solicitar agora a cesión dunha das ferramentas a través do programa de préstamo destas ferramentas posto en marcha polo Concello, “o que nos axudará a mellorar a eficacia da compostaxe doméstica no municipio e será de gran axuda a moitos veciños para reutilizar os restos da poda, evitando así vertidos nos contedores e queimas que se poden descontrolar”, remarcou o alcalde Agustín Reguera.
