"Ou Mariano Abalo cambia de actitude ou deixará de formar parte deste goberno"

–O peche obrigado que sofriu no consistorio despois da reunión coa confraría e a promotora do porto deportivo de Massó, ven a confirmar que a imaxe de Cangas segue ligada á conflictividade?

–Non se poden negar episodios de conflictividade social cando hai só 24 horas estabamos varias persoas secuestradas no Concello, entre elas a alcaldesa. Pero tampouco que o responsable desta imaxe de conflictividade é un grupo moi minoritario empeñado en someter a este pobo nun estado de excepción. Como máxima responsable municipal prodúceme preocupación, porque a gran maioría quere a paz social que uns poucos pretenden truncar, e vive o día a día con normalidade. Cangas é un pobo acolledor e un destino idóneo para as vacacións.

–O proxecto de Marina Atlántica é agora o cabalo de batalla. ¿Que pode e debe facer vostede para poñer fin ao conflicto, máis aínda cando varios miles de persoas rexeitaron o proxecto cunha manifestación, entre elas membros da súa propia formación política?

–Para min ese tema rematou. Fixen todo o que estivo nas miñas mans. Desde a oposición, presentando alegacións e dirixíndome á Autoridade Portuaria, e como alcaldesa, esixindo o rescate da concesión á Autoridade Portuaria e buscando saídas dialogadas á situación. Sigo estando a disposición das partes implicadas para que sigan falando e poidan chegar a acordos. Con respecto da manifestación, síntome representada polos compañeiros que acudiron, pero tamén teño claro que unha porcentaxe importante da poboación de Cangas quere que ese porto se constrúa, e eu débome a todos os veciños. Iso si, dos que non o queren, só unha inmensa minoría practica o acoso diario á alcaldesa e á institución municipal, e hai que tomar medidas para que deixen de facelo.

–¿E cal é o camiño?

–O primeiro paso debe ser o cambio claro de actitude do grupo de concelleiros que o respalda [en alusión a ACE], se queren seguir formando parte deste goberno. Pode parecer unha decisión espontánea, pero son reflexiva e penso nas consecuencias. O que estou plantexando firmemente é que, ou se remata con este acoso por parte de concelleiros do propio goberno, ou tomarei medidas contundentes.

–¿Quere decir que está disposta a quitarlle as atribucións aos edís de Alternativa Canguesa de Esquerdas?

–A alternativa pasa por prescindir de un concelleiro do equipo de goberno [en alusión a Mariano Abalo]. Estes días será convocado e vou poñerllo ben claro: ou cambia de actitude ou se prescinde del. Con máis motivo cando o departamento de Urbanismo está abandonado e ducias de veciños acuden á Alcaldía para manifestar queixas. A situación non é a máis desexable, e así non se pode seguir.

–Abalo ten a súa representatividade social, que leva exercendo máis de tres décadas, e con protagonismo en distintos momentos...

–Ninguén di o contrario. Pero neste goberno, se Abalo modificou a vida política de Cangas foi nos últimos meses, e por unha cuestión e un método moi particular. Non pode seguir neste barco así, e del depende se quere seguir ou apearse.

–Repróchalle que non dea todos os pasos necesarios para cumprir o pacto de goberno sobre as instalacións náuticas do Salgueirón.

–Repito que fixen todo o que estaba nas miñas mans, e agora deberán ser outros os interlocutores: a confraría, a empresa e, sobre todo, a Autoridade Portuaria, que foi a que outorgou a concesión e a que ten competencias para rescatala. Ao contrario do que queren algúns, a partires de agora voume a ocupar e centrarme nas necesidades de Cangas, como veño facendo en dous anos de goberno, donde se lograron equipamentos como galescolas, o pavillón do Hío, o local de ensaios de Cimadevila, o novo colexio de Castrillón, a ampliación do de A Rúa, a reforma da Casa da Cultura, da Casa da Música, a mellora do alumeado... Repito, non vou permitir que un grupo minoritario de persoas distorsionen a realidade de Cangas e o traballo realizado. Non vou cambiar de opinión polo acoso, os insultos e as amenazas dun grupo minoritario e, coa lei na man.

–Din os seus detractores que Cangas se está gobernando desde fóra, en referencia explícita, entre outros, á Autoridade Portuaria.

–Desde Punta Rodeira ata Punta Couso é certo que hai unha franxa costeira que se goberna desde fóra de Cangas, pero non é ningún segredo porque hai varias zonas que son competencia doutras administracións: Costas, Xunta, Autoridade Portuaria... Pasa en Cangas e en calquera municipio costeiro, e se fora noso, desde logo, habería outra ordenación moi diferente. Non estarían as parroquias sementadas de galpóns, e a primeira liña urbana non estaría deseñada así, con eses departamentos para os mariñeiros, esa marquesiña de autobús, a nave de deportes náuticos ou a nova lonxa, que pechan cada vez máis Cangas ao mar, algo que rexeitan a maioría dos cidadáns. Pero eu só podo ordenar donde teño competencias, e o futuro de Massó está en mans de Corina Porro, non nas miñas. O demais é demagoxia.

–¿Non considera representativo que milleiros de cidadáns saian a rúa para rexeitar a proposta para O Salgueirón? .

–Respeto aos manifestantes, sexan ducias, centenares ou milleiros. A última foi moito máis concurrida ca primeira porque foi convocada pola confraría, e non por outros. E é certo que acudiu xente de Cangas e tamén moita de fóra, e todos son representativos e merecen respeto. Tamén os que non foron, porque a outra lectura é que, se 5.000 cangueses acudiron, outros 20.000 quedaron na casa. Sexa como sexa, este problema non se soluciona con manifestacións, e menos ainda insultando e amenazando a diario no Concello, como fan uns poucos, contra a alcaldesa co obxectivo de pasarlle ao BNG facturas do pasado.

–Tamén reprochan a "ocupación" do pobo pola Garda Civil e o recurso á forza.

–Bueno, nun mitin de algunha organización política ese tipo de mensaxe pode calar, pero para unha cidadanía madura como a nosa o argumento semella algo pueril e máis ben froito dunha confusión mental.