Xabier Ríos será quen releve a María Villaronga na portavocía do grupo municipal do BNG. Para o concelleiro, que foi de número dous na candidatura, é "un reto importante" no que intentará "estar ao nivel que ela o deixou", pois a moza carrilexa estreouse no 2012 no cargo, no que axiña colleu soltura e firmeza á hora de defender as propostas do BNG nos debates plenarios. Os momentos de maior enfrontamento dialéctico para a nacionalista sempre eran co popular Tomás Fole, que gobernou Vilagarcía entre 2011 e 2015.
Antes do PP foi o PSOE en coalición co BNG o que tomou o mando de Ravella. Logo dese periodo (2007-2011), o partido nacionalista volveu ás filas da oposición con tres edís. Os tres renunciaron -en distintos momentos- e o grupo municipal quedou conformado por María Villaronga, Xabier Ríos e Helena Mariño. Esta última concelleira foi nos últimos postos da lista, polo que non saíu elixida. No 24-M o BNG perdeu un concelleiro e quedaron en Ravella Ríos e Villaronga, á que agora substitúe Lucía César Veloso.
