A.M. - CAMBADOS
Xaquín Exidio Cuíñas é sobre todo coñecido en Cambados polo seu traballo en defensa da cultura marítima tradicional. Pero os seus veciños poderán descubrir o sábado, 2 de xaneiro, unha nova faceta súa, como é a de escritor.
Xaquín Exidio Cuíñas vén de publicar na editorial Todogrove Edicións a súa primeira novela, “Salgadoiro de queixo e mozzarella”. A obra está parcialmente ambientada en Cambados, vila na que naceu o propio autor en 1966. Cuíñas conta que a trama transcorre a principios da pasada década dos noventa. O protagonista “é unha persoa normal, pero que non se dá atopado no mundo”. Trátase, en palabras do autor, dun individio “sumerxido no desconcerto, que se ve desbordado polos acontecementos e que toma unha decisión drástica de transfiguración”.
Xaquín Cuíñas apunta que o personaxe principal da súa novela “é unha persoa perdida”, como tantos e tantos milleiros de homes e de mulleres reais que se ven desnortados, e superados polos acontecementos “e que non están contentos coas súas vidas ou cos seus traballos”.
A obra está escrita en primeira persoa –aínda que Cuíñas adianta que non se trata dunha peza autobiográfica– e transcorre por diversos escenarios, como a costa francesa, Buenos Aires, Santiago de Compostela, ou Cambados, onde se desenvolve unha parte da novela. Nesas páxinas, a maior parte das referencias son para o barrio mariñeiro de San Tomé.
Xaquín Cuíñas conta que “Salgadoiro de queixo e mozzarella” é sobre todo unha novela sarcástica, pero na que tamén hai elementos que poden aproximala ó chamado realismo máxico.
O libro preséntase o sábado, 2 de xaneiro, ás sete da tarde, na viñoteca A dos Piñeiros, que se atopa no número 53 da avenida da Pastora, en Cambados. Acudirán o propio Cuíñas e os responsables de Todogrove Edicións.
Murakami ou Mallo
Os responsables da editorial grovense afirman que a novela de Cuíñas “é unha crítica e irónica reflexión sobre a sociedade na que vivimos, narrada a través da historia do protagonista, que se embarca nunha viaxe persoal sen retorno”.
Engaden que a peza pretende ser tamén “unha reflexión sobre o materialismo imperante, que ás veces non permite a pausa precisa para disfrutar dos pequenos praceres da vida”. A obra está prologada por Fernando Pazos, quen afirma que “Salgadoiro de queixo e mozzarella” “é unha obra autenticamente posmoderna, no sentido máis contemporáneo da expresión”.
Na opinión de Pazos, a escrita de Cuíñas sitúase na liña de autores contemporáneos como Agustín Fernández Mallo ou Haruki Murakami. También salienta o prologuista que na novela do cambadés se produce unha fusión entre as novas tendencias da narrativa estranxeira e a tradición cultural galega.
Exidio Cuíñas naceu en Cambados en 1966 e é licenciado en Económicas pola Universidade de Santiago de Compostela. Tamén pinta, e na actualidade está traballando na súa segunda obra literaria, unha recompilación de relatos co mar como eixo central que se titulará “Contos Salgados”.
