Case dez anos antes de que Tarantino dirixise Pulp Fiction (1994) e se fixese coñecido polo seu estilo "pastiche" e a mestura de xéneros con continuas referencias culturais, nacía Dylan Dog, un fumetto nero (cómic de terror italiano) -portada de Claudio Villa, debuxos de Angelo Stano e guión de Tiziano Sclavi para a editorial Sergio Bonello- con tinguiduras pulp que non tardaría en converterse nunha icona. O título, O amañecer dos mortos vivintes, viña resultar unha clara homenaxe a George A. Romero e unha pista do universo que ía nacer.
O propio nome do personaxe fai referencia ao poeta Dylan Thomas e tamén a unha novela policíaca de Mickey Spillane, escritor de cómic pulp e novela negra, titulada en italiano Dog, fligio de. Mais non só iso: a maioría das historias están ambientadas en Londres, cidade na que vive Dylan. Concretamente, en Craven Road 7, nome escollido en honra a Wes Craven, guionista e produtor de sagas marabillosas como Scream ou Pesadelo en Elm Street.
Dylan Dog é un investigador privado, pero un moi especial, xa que se dedica aos misterios sobrenaturais e acaba sendo coñecido como "o detective dos pesadelos". Irónico e torturado, a pesar da súa dedicación ao oculto, Dylan é unha persoa bastante excéptica: un ex alcohólico de trinta e poucos anos co rostro do actor Ruppert Everett (a petición expresa de Sclavi) e unha eterna vestimenta: jeans azuis, chaqueta negra, camisa vermella e zapatos Clarks. Para completar o estereotipo, é propenso á depresión e un gran mullereiro. E para rompelo un pouco, é amante dos libros e do compositor e violinista Giuseppe Tartini pero tamén da música heavy metal. Acompáñao en todas as súas investigacións Groucho, un ex actor sospeitosamente parecido en físico e actitude ao famoso cómico do que leva o nome. O cómic aborda en cada episodio, sempre autoconclusivos, un "monstro" a miúdo inspirado en referencias do cinema ou da literatura de xénero, o que o converte nunha gran diversión para os coñecedores deste tipo de literatura. Pero Dog non só fai referencias ao xénero,senón aínda ao mundo da cultura, desde o cinema popular á pintura, pasando pola música clásica, jazz ou heavy metal.
Ademais do carácter polémico do protagonista, polas súas páxinas pasan supostos monstros sobrenaturais (que en moitos casos son un reflexo das inquietudes e debilidades humanas) e multitude de individuos marxinais, ás veces violentos ou sexuais, que lle supuxeron grandes críticas e ameazas de censura. Mais foron precisamente estes elementos os que o elevaron a cómic de culto, non soamente polo componente subversivo, senón pola capacidade de representar e dar voz aos inadaptados. Grazas a iso, rompe os estereotipos dos que parte e consegue crear personaxes con profundidade.
Non se trata do primeiro cómic italiano que cuestiona ou rompe as convencións tradicionais, xa existían Milo Manara, Guido Crepax ou Hugo Pratt, pero si o primeiro en facelo desligándose da etiqueta de "cómic de autor", nun formato popular, a tira cómica, destinado ao gran consumo, mesmo daqueles non afeccionados. A pesar do seu éxito, non tivo moita sorte nas adaptacións audiovisuais. Existe unha película terrible de 2010, Os mortos da noite e unha sorte de homenaxe "apócrifa", A miña moza é unha zombie (1994), sen referencia directa a Dylan, con guión do propio Sclavi e protagonizada, xustamente, por Rupert Everett. Pero quizais a cousa mellore: está a prepararse para 2020 unha serie de acción real, en inglés, orientada ao público internacional, producida por James Wan, o creador de sagas como Saw, Insidious ou Annabelle.
Mentres tanto, xa se pode desfrutar da colaboración entre Sergio Bonelli e DC, que crearon unha serie co-protagonizada por Batman e Dylan Dog. Un crossover sen precedentes que se presentou no pasado festival Lucca Cómics and Games 2019. Iso si, pódese facer en inglés ou italiano, de momento.
Pablo Carreiro: Chico!
- Pasamos dunha homenaxe a unha novidade recente: Chico!, a primeira obra do seu autor, Pablo Carreiro (Vigo, 1985), quen, despois de ver a súa proposta rexeitada por varias editoriais, decidiu crear un crowdfunding a través de Libros.com. Así en menos dun mes obtivo o diñeiro necesario para facer a súa novela realidade e, desde outubro, podemos mercala, tanto en formato de tapa branda como en ebook. Chico! é unha novela gráfica composta por tiras autoconclusivas que reconstrúen a vida adulta de Berto - e os seus anhelos, frustracións e tamén alegrías-, un mozo corrente que comparte cervexas, anécdotas, aventuras e desventuras co seu grupo de amigas. Nunha destas aventuras coñece a Ricky, de quen case namora. Por sorte, antes de cometer ese erro, coñece tamén a Marco, a súa parella, non sen antes vivir máis dalgún enredo ou situación incómodas. A Berto pásanlle as mesmas cousas que che poderían pasar a ti, porque a intención de Pablo Carreiro é resaltar a importancia do cotián e conectar coas emocións que nos espertan, aínda que ás veces ignoremos, os detalles do día a día. Se queres probar un bocadiño antes de decidirte a lela, podes desfrutar das súas tiras na súa conta de Instagram, @ p_carreiro.