Un grupo de alumnos e alumnas de cuarto curso da ESO do Colegio Vigo tivo a sorte de ser seleccionado para participar en Scholas Ciudadanía (Programa educativo da Fundación Scholas Ocurrentes) que tivo lugar en Vigo desde o pasado día 27 de setembro e durante toda a primeira semana de outubro.
"Os nosos escolares viñeron encantados coa experiencia, pois poucas veces, segundo nos comentaban, teñen oportunidade de sentirse escoitados e de poder sentir que a súa opinión tamén é tida en conta na sociedade. Chegaron convencidos de que a través da comunicación, o consenso, despois de coñecer distintas opinións e investigar sobre diferentes temas é máis doado entender o noso mundo", aseguraron os responsables do Colegio Vigo sobre esta participación en Scholas Ciudadanía.
O programa consta de dúas etapas. Na primeira, o alumnado participante debatiu sobre problemas que afectan á súa comunidade e elixiron por votación dous temas: a educación e o acoso. Na segunda etapa levouse a cabo un traballo de investigación para afondar nesas problemáticas e deseñar propostas de cambio.
Educar en valores
O alumnado, partindo das súas experiencias e intereses, traballou coa intención de xerar transformacións positivas en si mesmos e na súa contorna, tendo como base valores como a responsabilidade, a capacidade de escoitar aos demais, o entendemento da diversidade, a oportunidade de poder expresarse desde distintas disciplinas artísticas e por suposto o traballo en equipo.
"Desde o noso centro aproveitamos a ocasión para agradecer a Scholas Ciudadanía a oportunidade brindada aos nosos escolares para participar neste programa onde os participantes, ademais de divertirse moitísimo e sentirse como en casa, expresaron libremente as súas inquedanzas e comprobaron sobre todo que na diversidade de opinións e o respecto aos demais radica a riqueza. Toda unha experiencia que esperamos repetir", resaltan os responsables do centro escolar ubicado en Rande.
