Trinta autores analizan a figura de Xosé Filgueira Valverde nos Cadernos Ramón Piñeiro, publicación que será presentada en Marín o vindeiro martes día 16 como preámbulo á conferencia "Xosé Filgueira: reflexións sobre a súa vida e as súas obras", impartida polo director do Museo de Pontevedra, Carlos Valle.
Trátase do volume XXXI destes Cadernos, que leva por título "Xosé Filgueira Valverde. Homenaxe. Quíxose con primor e feitura". A súa presentación correrá a cargo do editor Luis Cochón, coa participación do secretario xeral de Política Lingüística, Valentín García Gómez.
O Clube de Opinión Portocelo organiza este acto na memoria do profesor Xosé Filgueira Valverde, homenaxeado no Día das Letras Galegas 2015, que comenzará ás 20.00 horas no Museo Manuel Torres.
Logo da presentación de "Cadernos Ramón Piñeiro", ofrecerase a conferencia do director do Museo de Pontevedra e doutor en Historia da Arte Xosé Carlos Valle, quen foi alumno de Filgueira Valverde.
Con este acto o foro de opinión marinense "quere unirse a todas cantas voces se veñen facendo eco da importante traxectoria cultural do profesor Filgueira Valverde, como quedou recoñecida ao terlle sido adicado o Día das Letras Galegas", expón o promotor da iniciativa, Ángel García Carragal, quen salienta que Xosé Filgueira Valverde foi un dos primeiros conferenciantes que pasaron polo Club de Opinión Portocelo nada máis ser fundado, hai máis de 25 anos.
