A situación económica da provincia de Ourense é dramática, a crise deixou ás persoas sen expectativa de futuro. Emprego temporal e precario en todos os sectores produtivos: a contratación máis estendida e habitual é a temporal, precaria e con baixos salarios. Mes tras mes, as contratacións temporais superan o 80% dos contratos asinados, converténdose a eventualidade e a precariedade nun xeito de contratación estrutural, que non permite ás persoas o desenvolvemento dun proxecto vital de futuro, sendo as mulleres da provincia as mais afectadas por esta situación.
Máis persoas inactivas que activas: Os últimos datos da EPA amosan un crecemento deste diferencial negativo, 140.700 persoas inactivas por 130.000 activas, con perda constante de poboación e sen que ningunha institución ou administración pública tome medidas.
Mais pensionistas que traballadores e, as pensións, as mais baixas do estado: A falta de inversións e a aposta teimuda por un modelo fracasado, baseado en actividades de pouco valor engadido, provocan que Ourense non ofreza ningún futuro ás persoas, especialmente ás máis novas, que se ven forzadas a emigrar.
*Secretario Xeral Unión Intercomarcal CC OO Ourense.
