“Coa luz do corazón”, espazo dirixido e escrito por X.H. Rivadulla Corcón, chega mañá, sábado (TVG, 19.45 horas), a súa emisión número oito coa intención de mergullarse nun mundo moi doce. Neste caso, Corina Mañá, unha muller de paixóns diversas, mostra a las claras unha delas: os doces, as tortas e os pasteis. Unha paixón que, dende logo, comparte con moita xente. Pero unha cousa ben distinta é gozar do pracer de comer doces e outra do pracer de facelos. E quizais a quintaesencia dos doces estea en xuntar os dous praceres. Así que en “Paseando por un mundo doce” o programa propone a Corina ter a experiencia de facer unha torta e logo degustala.
Para facer a torta o espazo achégase a unha pastelería que teña algo especial, e atopamos en Cangas do Morrazo unha cafetería pastelería que fai doces de vangarda, chámase “O pequeno lambón”. Nela, o mestre pasteleiro é Álex Pérez e atende a cafetería e pastelería Sara Martínez.
“Coa luz do corazón” chega con Corina á pastelería e os reciben Sara e Álex, e toman con eles uns cafés mentres lle explican a Corina o tipo de doces que fan. Un tipo de torta moi especial que eles fan son as tortas con efectos espello. A Corina cústalle entender este concepto, pero cando consigue comprendelo queda fascinada pola idea. Trátase dunha torta que vai recuberta por unha película elaborada con ingredientes naturais que fan o mesmo efecto que un espello: podes verte reflectido na superficie da torta. É realmente un efecto sorprendente e atraínte.
Álex Pérez e Sara Martínez fascinan a Corina Mañá coa forma de facer os seus doces
Mentres Álex e Sara están explicándolle a Corina como son estas tortas, entra no establecemento Anselmo Rodríguez , un taberneiro veciño do “Pequeno lambón”, que rexenta a taberna “Manolo Mañanita”, e ven a encargar unha torta. Presentámoslle a Corina a Anselmo e falan moito, os dous son moi faladores, e Anselmo quere que a torta lla prepare Corina. A Álex parécelle boa idea, e vai con Corina ao obradoiro a facer o traballo.
No obradoiro o primeiro que fai Álex e situar a Corina mostrándolle onde están todos os electrodoméstico e utensilios cos que teñen que traballar. Despois póñense a elaborar a torta. Corina vai traballando seguindo as indicacións de Álex. Como xa é habitual, Corina sorpréndenos coa súa habilidade e determinación. Bate ovos, espreme limóns, amasa, monta a nata... parece que toda a vida fora reposteira.
Cando a torta está, Sara, Álex e Corina Mañá van levarlla a Anselmo á taberna “Manolo Mañanita”. Alí os agarda tamén Corcón, o presentador do programa. Anselmo ten a idea de que se coman a torta entre todos e saca un viño da súa terra para acompañalo, viño de Toledo. A torta está riquísima, no podería ser doutro xeito feita por Corina, e todos brindan cheos de ledicia.
O programa remata cunha entrevista do presentador Rivadulla Corcón a Corina, onde esta conta como viviu a experiencia de ter feito unha torta con efecto espello no “Pequeno lambón”.