A tanxurrevolución xa está en Benidorm

Sabela e Aida reatopáronse onte na cidade levantina tras ser apartadas polo coronavirus mentres a viguesa Laura Iturralde será a responsable da escenografía da súa actuación

Mar Mato

Mar Mato

Sabela Maneiro –unha das compoñentes de Tanxugueiras– xa non está soa en Benidorm. Na mañá de onte collía un voo Aida Tarrío para reunirse con ela, á espera de que entre hoxe e mañá o faga tamén Olaia Maneiro, xa que o COVID lles impedira ás tres voar xuntas o domingo, cando tiñan previsto, rumbo ao festival levantino.

O anuncio do reencontro foi aplaudido nas redes sociais polos tanxufans. Non foi a única novidade do día. A axencia do grupo, a buenense PlayPlan, revelaba no Twitter unha imaxe dunha xigante pancarta na rúa Alcalá en Madrid.

Nela, facía un xogo fonético e gráfico co nome para subliñar que non se pronuncia Tanchungueiras senón Tanxugueiras, ao tempo que daban un consello para acertar coa pronuncia: enfatizar cada sílaba para que o x sexa pronunciado como debe ser.

Outra das revelacións da xornada consistiu en desvelar algúns detalles do que será a posta en escena da actuación prevista para mañá mércores no Benidorm Fest cando participará Tanxugueiras na primeira semifinal do certame a partir das 22.40 horas.

En primeiro lugar, Tanxugueiras non estarán soas no escenario. Estarán acompañadas por varios artistas galegos e galegas. Iago Pico, coautor de “Terra” tamén actuará na percusión electrónica.

Ademais, tamén se soubo que a escenografía correspóndelle á viguesa Laura Iturralde, quen o ano pasado conseguiu o premio da Asociación de Directores de Escena na categoría de mellor iluminación na obra teatral “Fariña”.

A coordinación dos movementos das tres pandereteiras é obra de Silvia Iria Miramontes mentres que Fran Sieira –responsable da compañía homónima na que traballa Aida Tarrío– se encarga do deseño do baile do todo o equipo no escenario.

Para o deseño do vestiario, o elixido foi o ourensán Jorge de Álvarez; para a maquillaxe, Miguel Bling; e nos audiovisuais, Marta Verde.

Quen queira apoiar a Tanxugueiras mañá mércores ou o sábado –de pasaren á final– deben seguir o programa televisivo que RTVE ofrecerá a partir das 22.40 horas. Unha vez toquen todos os artistas participantes, os presentadores da gala, Alaska, Máximo Huerta e Inés Hernanz, anunciarán a apertura das liñas para que os espectadores (o voto do público supón o 25% dos puntos que determinarán o gañador) elixan mediante chamada telefónica e SMS. Darán entre 15 e 20 minutos para a votación. Unha vez se pechen as liñas, iniciarán o reconto dos votos.

Tracking Pixel Contents