O 28 de xuño arranca a Mostra de Teatro Cómico e Festivo de Cangas. Un ano máis, a vila do Morrazo convértese nun referente español do teatro de humor, ao que leva consagradas xa 36 edicións do festival. Ao longo de nove días, os amantes do teatro terán a oportunidade de ver máis dunha vintena de espectáculos teatrais, que serán representados no Auditorio de Cangas ou na rúa, en diferentes espazos do concello morracense.
A 36 Mostra comezará co pregón de Quico Cadaval. O actor, dramaturgo, director e impulsor do movemento de contacontos xurdido en Galicia na década dos 90 actuará nesta edición co espectáculo "Vacas, Guerras, Porcos e Cregos", da compañía que actualmente dirixe, Producións Excéntricas, da que tamén se programa na MITCFC a obra "Carpe Diem".
No acto inaugural, que se celebra ás 22.30 horas no Auditorio Municipal de Cangas, a cantautora María Xosé Silvar, máis coñecida como Sés, recibirá o Premio Mulleres en Acción "en recoñecemento ao seu espléndido labor artístico, compromiso e discurso a prol da igualdade e empoderamento das mulleres".
Cinco estreas
A MITCFC acollerá este ano cinco estreas absolutas: "A Illa das Matriarcas", unha coprodución galego inglesa das compañías Aporia Escénica e Theatre of Ancients; "Crunch", unha coprodución da compañía galega Muuu e da Mostra; "La Gran Ofensa", de la Bendita Compañia e El Terrat (Cataluña); "Proxecto Cuco. Cultura contra o cambio climático", outra coprodución da MITCFC con Teatro Tío Teixo; e "C'est pas possible", de Sempre Arriba coproducida pola Mostra.
Ademais, o público poderá ver cinco estreas en Galicia de obras como "Comedia Aquilana", de Nao de Amores & Cia (Castela e León); "Donna Quixota", de Pina Polar (Polonia); "La mujer perdida", da compañía asturiana Teatro del Norte; "El desguace de las musas", de La Zaranda; e "Tentación Divina", da compañía Artlequín (Arxentina/España).
"Comedia Aquilana" é o espectáculo que inaugura as representacións en sala da XXXVI Mostra. Trátase dunha comedia renacentista musical dirixida por Ana Zamora. A música en directo non só acompaña, senón que dá ritmo a moitas das esceas como parte indivisible do 'todo interpretativo'. É unha coprodución da compañía Nao de Amores coa Compañía Nacional de Teatro Clásico.
O sábado 29 de xuño, La Bendita Compañía e El Terrat estrean, en primicia mundial, a obra "La Gran Ofensa", un espectáculo que fala da persecución do humor, un tema, por desgraza, moi de actualidade. A presenza desta obra en Cangas encádrase na irmandade asinada o ano pasado entre a Mostra e o Singlot Festival (Xirona), que dirixe o humorista Andreu Buenafuente. "La Gran Ofensa" foi o proxecto gañador do premio Terrat Nou Talent en 2018. Este espectáculo estréase en Cangas froito do acordo entre Singlot e MITCFC. Pola súa banda, no festival xerundense, que se celebra en Sant Feliú de Guixols (Xirona) entre os días 4 e 7 de xullo, poderán ver o espectáculo "Vacas, Guerras, Porcos e Cregos" de Quico Cadaval.
O domingo 30 de xuño, Quico Cadaval recunca con esta edición da Mostra no seu papel de dramaturgo e director coa obra "Carpe Diem", unha atrevida tentativa de converter en teatro un dos mais excitantes contos do maior autor vivo en lingua portuguesa. Un espectáculo con música en directo que seguro sorprenderá.
A compañía "Os Monicreques de Kukas", que este ano reciben o Premio Xiria á Labor Teatral da MITCFC, actuarán o mércores 3 de xullo no Auditorio de Cangas coa obra "Arlequina", un espectáculo dirixido a todos os públicos que combina o traballo de actor e a pantomima coa animación de marionetas e a maxia. Con música en directo.
O venres desa semana, os espectadores poderán ver a obra "El desguace de las musas", da prestixiosa compañía La Zaranda. A peza teatral conta, como é habitual, co texto de Eusebio Calonge e Paco de la Zaranda, ademais do elenco formado por Gaspar Campuzano, Enrique Bustos y Francisco Sáchez, 'clasicos' das postas en escea da compañía, "El desguace de las musas" conta co traballo dos intérpretes Gabino Diego e Inma Barrionuevo, e da soprano María Ángeles Pérez-Muñoz. Todo o conxunto teatral para unha viaxe de descuberta sobre como comezou o teatro a perder o seu espírito creativo para converterse en mero negocio.
A Mostra chegará ao seu fin, o sábado 6 de xullo, coa obra de coprodución angloespañola "Generación Why", de Teatro en Vilo, compañía que en 2016 recibiu o Premio do Público da Mostra de Cangas coa maxistral e exitosa representación de "Interrupted", o seu primeiro espectáculo. Con "Generación Why", a compañía retoma o humor absurdo e a poética corporal daquel iniciático proxecto continuando a súa busca de novas linguaxes escénicas para mergullarse argumentalmente no misterio dos tempos que nos quedan por vivir.
As direcotoras de Teatro en Vilo, Andrea Jiménez, Noemí Rodríguez, serán as encargadas de impartir un obradoiro sobre "A dramaturxia actoral e os procesos de creacion colectiva". Este taller levarase a cabo na Casa de Cultura de Cangas, en horario de 10 a 15 horas, entre os días 3 e 5 de xullo, ambos incluídos.
Torneo de Dramaturxia
O Torneo de Dramaturxia de Galicia consolídase como unha aposta firme da MITCFC para dar a coñecer a nosa dramaturxia, creando un nexo directo entre autoras/es e público.
Este proxecto, pioneiro en Galicia e que este año chega á súa terceira edición, conta coa imprescindible colaboración de DramaturGA, a primeira asociación profesional da dramaturxia galega.
No III Torneo de Dramaturxia, haberá unha mestra de cerimonias única, Esther F. Carrodeguas, que presentará este furioso combate no que catro recoñecidas dramaturGAS e dramaturGOS de Galicia se baterán na procura do voto do público. As armas a usar? Retruques da palabra, ideas, ritmos, conflitos, sorpresas, accións, silencios.
O público asistirá a catro lecturas dramatizadas, interpretadas por actrices e actores profesionais de recoñecido prestixio, e será o propio público quen vote os textos que máis lles teñan gustado para que, de entre as catro pezas participantes, resulte unha soa a gañadora. Carmen Conde, Ana Carreira, Fran Godón e Zé Paredes serán os intérpretes, que estarán acompañados polo pianista Velpister.
Un espectáculo teatral, divertido e único que se verá avivado pola participación activa do público.
O cartaz de Luís Davila
O cartel da XXXVI MITCFC é obra do deseñador gráfico, ilustrador e viñetista Luís Davila. Deste xeito, a Mostra prosegue a liña iniciada hai xa varios anos de encargar o cartel das diferentes edicións a persoas de recoñecido prestixio no ámbito das artes plásticas ou da pintura.
Os 36 carteis que anunciaron a MITCFC particularizan e diferencian cada unha das edicións, complementando a nosa imaxe corporativa, un logotipo creado polo artista local Manuel Pizcueta, sempre presente en todas as comunicacións.
Nos últimos anos, artistas como Pablo Giráldez "O Pastor", Milicia Gráfica, Pancho Lapeña, Susana Rey, Diego Seixo ou María Mazás contribuíron coas súas creacións a proxectar a nosa imaxe, comprimindo nun cartel a información que queremos transmitir e anunciar, invitando e abrindo ao público a porta desta gran festa do teatro e o humor que é a MITCFC.
