O novo Pórtico da Gloria

O Pórtico da Gloria da Catedral de Santiago, considerada unha obra cume do Mestre Mateo, recuperou o seu esplendor despois de 50.000 horas de traballo por parte dos equipos de restauración.

O minucioso labor levado a cabo no que se considera un dos máis destacados expoñentes do románico europeo chegou ao seu fin, tras un investimento millonario e máis de dez anos oculta polas estadas que facilitaron o labor levado a cabo por expertos nacionais e internacionais para completar a súa recuperación.

O arcebispo de Santiago de Compostela, Julián Barrio, e José María Arias Mosquera, presidente da Fundación Barrié, entidade que dedicou 6,2 millóns de euros a custear a restauración, presentaron en xuño o resultado final dos traballos de restauración do Pórtico da Gloria.

Na inauguración participou a raíña Sofía, pero a apertura ao público non chegará previsiblemente ata finais deste mes, unha vez que se adoptaron as adecuadas medidas de protección ante a avalancha de visitas que se espera na basílica compostelá. A raíña emérita presidiu o acto, ao que asistiron tamén o presidente da Xunta, Alberto Núñez Feijóo; a presidenta do Congreso, Ana Pastor; o novo ministro de Cultura, José Guirao; o presidente da Fundación Barrié de la Maza, José María Arias; e o arcebispo de Santiago, Julián Barrio.

A restauración do Pórtico da Gloria iniciouse no ano 2008 despois de que a Fundación Barrié, pertencente ao antigo Banco Pastor, aprobase o financiamento dunha das obras máis complexas de Galicia, despois do éxito que supuxera a do coro pétreo do Mestre Mateo na década de 1990. As obras, que estiveron enfocadas non só a restauración senón tamén a eliminación das humidades e das filtracións de auga dende as cubertas, desvelan unha imaxe moi renovada do andar central —o pórtico consta de tres andares, a terra, o xuízo e a gloria— ao recuperar parte das pinturas orixinais.