A muralla de pedra de Vilafría acollerá o II Sons da Canteira

Sons da Canteira é un festival de música galega organizado polo Concello do Porriño que se celebrará o sábado, 28 de agosto, na canteira en proceso de restauración de Vilafría. Esta será a súa segunda edición e contará coa actuación de catro artistas galegos e unha artista internacional da música e de videocreación.

Soará o trap galego, o flow costumista e o twerking rural de Boyanka Kostova; o pop, disco e trap de Verto; o folklore africano, a electrónica e o dancehall da lisboeta Pongo que ofrecerá en Sons da Canteira o seu único concerto en España; os sons eclécticos de Mounqup, que estreará no festival o seu novo espectáculo de gran formato, “Akelarre AVS Extended Show”; sets variados e transversais da DJ Teresa Ferreiro; e o grupo local de danza e música tradicional Os Penediños de Atios.

O escenario será moi singular, a muralla de pedra e sobre ela empregarase videomapping para que os grupos emitan as súas proxeccións.

As entradas poden mercarse na web sonsdacanteira.gal ata esgotarse. O prezo das entradas é de 24 €euros por persoa a entrada individual, mentres que en parellas será de 22 euros por persoa, para grupos de catro e seis asistentes.

Para facilitar o acceso á Canteira de Vilafría, a organización porá a disposición autobuses gratuítos. Á hora de facer a compra cada persoa poderá escoller o horario de autobús que mellor se lle axuste, xa que este será o único xeito de acceder cun vehículo ao recinto do festival.

Unha vez no recinto, a pulseira de acceso funcionará tamén como moedeiro para facer todos os pagos pertinentes durante o festival utilizando a tecnoloxía cashless. Do mesmo xeito, o festival implanta nesta edición un servizo de atención en mesa para evitar aglomeracións e desprazamentos durante os concertos.