Se pensamos nunha personaxe feminina da historia do noso país, esa non podería ser outra ca Rosalía de Castro. Pola súa vida, pola súa obra, polo fito que marcou e pola afouteza coa que encarou os seus sentimentos converteuse nunha das mulleres máis admiradas do país.
Isto debeu ser o que pensaron os que botaron a andar a colección "Mulleres bravas da nosa historia" de Urco Editora, porque foi Rosalía a primeira muller elixida e a esta seguiranlle outras como María Victoria Moreno ou ...
O libro dirixido ao público mozo consta de tres apartados. A historia da vida de Rosalía ficcionada ocupa a parte fundamental, unha cronoloxía breve para fixar as datas máis significativas e un grupo de actividades de carácter lúdico para que os rapaces reflexionen sobre o lido, seguido do solucionario correspondente, rematan o volume que escribe María Lado e que ilustra Eva Agra, escollendo para a ocasión unhas suxestivas imaxes nas que mestura o trazo sinxelo e ben perfilado cunha certa escuridade que semella presidir as secuencias e que acompañan o texto, solemne por veces, e máis cotiá noutras ocasións. O ton desenfadado e a expresión amable permítelles aos destinatarios gozar dun texto admirable pola súa calidez e cercanía.
A vida de Rosalía de Castro é contada por un lucecú que está a carón da poeta dende o seu nacemento o 24 de febreiro de 1837 ata o 15 de xullo de 1885 cando morre na Casa da Matanza en Padrón e mesmo máis alá cando en 1891 os seus restos son trasladados á capela da Visitación no convento de San Domingos de Bonaval, hoxe Panteón dos Galegos Ilustres.
Polo camiño vai achegando aqueles datos que dalgunha maneira marcan o percorrido vital de Rosalía con máis sombras ca luces, debido ás doenzas propias e alleas que sofre e que explican a súa obra e o seu legado.
Completa a narración ficcionada unhas breves reflexións acerca dalgún punto concreto que ten que ver coa súa vida e/ou coa súa obra no que o ton formal dá paso unhas veces á coloquialidade con interxeccións e exclamacións e outras a poemas que exemplifican vivencias ou estados de ánimos.
Os continuos traslados, a formación que recibiou, as amizades que fixo ao longo da súa vida, o casamento con Murguía, os fillos e mesmo as mortes da súa nai e dunha amiga, aderezadas cun certo romanticismo, fan da súa vida un mostra desa bravura que preside a recén-nacida colección.
LADO, María, Rosalía de Castro (Ilstr. Eva Agra), Ed. Urco, Santiago, 2016, PVP. 9 ?
