Cine Miúdo chega un ano máis da man do Festival Primavera do Cine en Vigo para mostrar ós máis pequenos a estreita relación que hai entre o cine e a música e convertelos nos auténticos protagonistas da xornada.
Entre mañán e o venres, os cativos poderán ver diferentes pezas de cine musicalizadas ó vivo grazas ó trío Casperverk e ata poderán substituílos e ser eles mesmos os encargados de harmonizar os filmes durante uns intres. Esta nova edición realizarase no teatro Afundación (antigo García Barbón) que cederá o seu espazo para apoiar ó festival e para o desfrute dos máis pequenos da casa. Sen dúbida trátase dunha actividade infantil cunha gran traxectoria e aceptación entre os docentes, pola súa valor pedagóxica e que ademais chea de ledicia a tódolos nenos que participan dela.
A iniciativa promovida polo Primavera do Cine pola que xa pasaron máis de mil cativos ó longo de todas ás edicións, está destinada exclusivamente ós colexios. A través de diferentes xogos e actividades, o programa de Cine Miúdo dividirase nun total de catro bloques nos que se explorará a vinculación da música co cinema. A parte máis divertida chegará cando sexan os propios rapaces os que toquen diferentes instrumentos de percusión para facer, en directo, a banda sonora dun anaco de película.