Parecerá mentira, preo as xentes do meu tempo e do meu curriculum, despois do catecismo escolar estudamos obrigados a asignatura de relixión católica en sete cursos de bacharelato e dous de universidade. Dado o nivel de coñecementos acadados nesta materia, moitos dos meus coevos e coevas manifestan a sorpresa que lles producen, coma a min me producen, certas noticias que saen na prensa relativas a novas orientacións da igrexa de Roma.
Cando nós eramos rapaces aprendemos que todos os pecados mortais son igualmente mortais, e hai que confesalos debidamente pola boca, experimentar contrición, quedar satisfeitos polo arrependemento e cumprir a penitencia imposta polo confesor.
Dicíase que había pecados tan horribeis que só podían ser absoltos polo coengo penitenciario da diocese, polo bispo e algún só polo Papa. Tiñamos, os rapaces, moita curiosidade por saber que pecados eran eses, pero nunca nos deron a lista deles. Acabo de enteirarme de que un deses pecados abominabeis era o aborto intencionado. Ao parecer Papa Francisco, nunha carta apostólica, retirou da lista dos pecados especiais o aborto e xa permite que calquera crego debidamente ordenado e non suspenso "a divinis" poida perdoalo. Seica o Papa, que nunca se arreda da doutrina común, do dogma nin da tradición católica, fala na súa carta, como facía Woytila e fixo sempre a Igrexa, de "morte de inocentes" ao referirse ao aborto.
É evidente que o Papa, ao dicir "inocentes" non fala con inocencia senón que está a demostrar a súa lealtade tradicional e dogmática. Non podemos esquecer que a Igrexa Católica, que mantén como mandamento da Lei de Deus o "non matar", aquí e sempre o aplica á condenación do aborto. Pero ela acepta que en certos casos poidamos matar aos nosos semellantes sen cometer pecado.
Creo lembrar que neses supostos se encontra a lexítima defensa, á que se asocia moralmente a pena de morte, e máis a guerra xusta. Os bispos españois apoiaron a Franco. Neste caso non se mataría "inocentes", coma no aborto, senón "culpabeis".
Roma semella moi preocupada polas inminentes conmemoracións do V Centenario da Reforma, e quere actualizar un dos puntos claves do conflicto co protestantismo que é a eliminación do sacramento da Penitencia ou como lle chamen hoxe.