Uribe loce contrariado porque as FARC fixeron as paces, tras longas negociacións en Cuba, co goberno de Colombia. Aínda que o ELN, fundado por Camilo Torres, non concluíu conversas amistosas e segue mobilizado, o acordo de paz principal culminou e resistentes armados pasarán a ocupar bancos no parlamento de Colombia. As FARC trocarán os fusís polos arados, diriamos pedíndolle emprestada a expresión ao escritor galaico-romano. Na memoria do mundo está o paso de Nelson Mandela da situación de terrorista preso á de presidente dunha Sudáfrica na que conviven tres etnias brancas e moitas máis bantus e bosquimanas. Parecía mentira que poidese ocorrer, pero ocorreu.
Ás veces, como é o caso de Colombia, pasan cousas consideradas boas pola xeneralidade das persoas. Todos acordamos os días nos que Gerry Adams, sen que o seu IRA renunciase á violencia, era membro do parlamento de Westminster polo Sinn Féin. Como os xornais de Madrid descoñecen os mecanismos interiores da Gran Bretaña e a historia de Irlanda, só sabían decer que o Sinn Féin era o "brazo político" do IRA. Menos mal que Bill Clinton non lle fixo caso aos columnistas de Madrid e deu pasos para coadxuvar á pacificación efectiva de Irlanda.
Apréciase en Madrid repulsión a que Arnaldo Otegi concorra como candidato ás eleccións, a pesar de que este expreso político nunca participou na loita armada e hai amplas correntes sociais que o apoian para participar na política dentro do marco legal vixente. Vexo que se está a producir un fenómeno curioso, aínda que fose repetido moitas veces ao longo do século XX. A totalidade dos nacionalismos autodeterministas do estado Español desexan que Otegi participe nunhas eleccións nas que el, con toda seguridade, sairía elixido. Prodúcese, así, o efecto Galeuska, no que tanto se implicou Castelao no tempo no que exercía o liderado nacionalista galego. Os partidos do sistema non procuran isto, estou seguro.
De todos modos, o que estou a comentar non é totalmente certo. Non só o PNV (sempre tan na órbita atlantista e europeista de orde) nin só os nacionalistas cataláns e galegos queren ver a Otegi nas eleccións. Agora tamén Podemos defende tal participación amosando, deste xeito, que o réxime da Reforma, ou tamén chamado da Transición, está en crise. En efecto, vexo Vicente Uribe furioso porque os fillos, e netos, de Tiro Fijo pasaron á loita civil e parlamentaria. Guillemo Tell tiene los ojos tristes, eis un drama de Alfonso Sastre.