Centenario de "A Nosa Terra"

"A Nosa Terra" foi un semanario publicado na Coruña entre 1907 e 1908, a iniciativa do sector galeguista de Solidaridad Gallega. Era rexionalista, anticaciquil e proagrario. A súa segunda etapa -da que celebramos este ano o seu centenario- iniciouse o 14 de novembro de 1916, coa publicación do primeiro número, tamén na Coruña, dirixido -inicialmente- polo avogado e escritor Xosé Iglesias Rouca, despois por Antón Vilar Ponte ata 1921 e, máis tarde, por Víctor Casas (aínda que nominalmente figurasen como directores Alexandre Bóveda, Suárez Picallo,...). Primeiro foi o órgano de expresión do sector coruñés das Irmandades da Fala e desde 1932 do Partido Galeguista, trasladándose a súa redacción a Pontevedra. En 1934 foi suspendido baixo o Goberno de Lerroux (nalgún sitio dise que por motivos económicos...), reaparecendo en 1935 e cesando de novo coa sublevación militar de 1936, na que foron asasinados -entre outros 40 membros das Irmandades- Víctor Casas e Anxel Casal (editor). A partir de 1942 editouse en Buenos Aires, actuando Castelao como director e editorialista. A partir de 1977 publicouse como semanario en Santiago de Compostela, dirixido por Margarita Ledo Andión e en 1981 traslada a súa redacción a Vigo, pasando a ser novo director en 1983, Afonso Eiré. Despois, nunha nova etapa, pasou a ser unha revista en color, baixo a propiedade de Jacinto Rey. E, finalmente, sairon uns números dixitalmente. Parte da súa antepenúltima etapa lémbroa perfectamente e califícoa de extremista. Despois moderouse e apostou pola creación literaria.