O Concello de Salceda estrea marca comercial

O Concello de Salceda de Caselas pon en marcha a súa propia Marca Comercial #ConSalceda. Nela aglutínase o tecido económico da vila e forma parte do proxecto de dinamización da actividade local no que se traballa dende o consistorio. Búscase fomentar o consumo local, para reiniciar a vida social e económica de Salceda, despois das consecuencias da pandemia.

Trátase dunha iniciativa que impulsa o Concello e que conta coa colaboración das asociacións de comerciantes da vila e dos titulares do postos da praza de abastos.

“Con Salceda” ten como finalidade converterse nunha marca de referencia para dar visibilidade a todo o comercio local, a hostalería, o mercado municipal e a praza de abastos. Unha marca comercial que identifica Salceda a través de valores implícitos como o de traballar conxuntamente para por en valor “o noso”.

Tendo en conta que o comercio e a hostalaría son a principal fonte dinamizadora e económica dun pobo, dende o Concello creen que a administración debe apostar por proxectos de apoio a estes sectores como medida de reactivación económica.

A iniciativa terá visibilidade a través de redes sociais, publicidade en medios, organización de actividades de dinamización e outras accións que se irán poñendo en marcha ao longo dos próximos meses.