Algunha vez ocorre que chega ás miñas mans un libro impagábel. Contemplalo e lelo resultan actos simultaneamente conmovedores. Isto sucédeme con Sementeira Porträts de Manuel Álvarez (A Guarda, 1954) e Manuel Rivas (A Coruña, 1957). Coñecín o primeiro alá polos anos 90 en Xenebra. Axiña descubrín a súa paixón pola fotografía e a súa enorme sensibilidade artística. Tamén trabei coñecemento da Sociedade Galega Sementeira, afincada en Basilea e integrada por emigrantes indómitos, completos de entusiasmo e de amor pola Terra vernácula. De Manuel Rivas tan só me cabe dicir que é un escritor total, que destila poesía e lucidez en cada texto que escribe, dono absoluto dunha lingua que manexa como ourive. Da unión de ambos nace o volume que agora comento.
Sementeira Porträts son corenta e dous retratos fotográficos onde Manuel Álvarez capturou a luz da alma das persoas, todas elas membros da sociedade galega na Suíza. Cantas historias resumidas nunha enruga, canta narrativa indócil nun ollar, canta dolorosa aprendizaxe nun sorriso e felicidade agachada nun aceno, e a saudade parada nas pupilas, e o orgullo como un país tranquilo nas mans traballadoras que se cruzan. Luces e sombras como mapas do corpo e dos sentires. Cada estampa supón unha intromisión nas fronteiras borrosas do espírito para outorgar máis claridade ás cousas. Imaxes como climas dun branco e negro que revelan a fluencia da vida.
Cada fotografía vai acompañada dun poema de Manuel Rivas. A maioría achéganse ao haiku ou ao aforismo. Na súa brevidade condensa momentos de esplendor: "Ruibén do solpor,/enfiar lusco e fusco./Tule de ceibes"; reflexións insondábeis: "Entre todos os recursos,/os da mirada./O de querer ver./O ver do querer"; estados de fondura emocionada: "O rumor compañeiro das voces,/a inquedanza das palabras cando emigran"; e mesmo profecías mesiánicas: "Pousará o sal da terra nos nosos ombreiros/e camiñaremos./Á espreita, camiñaremos./Mentres durmimos, camiñaremos". Díxeno antes, impagábel.
ÁLVAREZ, Manuel/RIVAS, Manuel, Sementeira Porträts, S.C. Sementeira, Basilea, 2019, PVP. 20 ?