Di Manuel M. Romón de Lito Portela que pinta o que non se ve a través do que se ve. "E non porque haxa algo alén do horizonte da pintura; senón [...] porque todo está aí, á vista".
En "Máis alá da paisaxe", o artista do Morrazo invita a mergullarse dentro das pezas, braceando entre olas, mares, montes, illas e cons. A exposición, a primeira que acolle a nova sala Apo'strophe.arte do centro comercial Praza Elíptica, pode visitarse até o vindeiro día 23. Concibida ex profeso para este espazo, é unha continuación dunha mostra anterior en Santiago de Compostela para a que Romón fixo o texto introdutorio. "Cando me ofreceron este espazo en Vigo, lin e relín o que escribira e a partir de aí creei o que aquí podedes ver", explica Portela.
O orgánico e a natureza, unha constante na obra do artista, exprésanse aquí a través da acuarela e o papel. "Son obras que me pedían esa idea do líquido que reflicte esta técnica. O papel de acuarela, ademais, rexistra todo o que fas; todo o que pintas sobre el, máis tarde ou máis cedo, acaba saíndo para fóra. E interesábame moito todo ese rastro que vou deixando nos bordos da peza", relata.
Obras sen marco pero enmarcadas por esa pegada no papel que comparten espazo con tres pezas escultóricas feitas do mesmo material. Nuns casos e noutros, a idea de movemento está clara: "Hai unha idea cinematográfica, que busca esa sensación de movemento, de que te poidas mergullar na auga", apunta o artista.
Non hai nada estático nas súas obras, cuxos puntos de vista tamén son diferentes ás dunha paisaxe convencional, máis baixos, espertando no espectador a sensación de que esas olas absolutamente atlánticas van romper riba súa.
