O festival de poesía Kerouac di adeus a Vigo tras quince anos de traballo

Hai novas que son tristes de escribir. É o caso desta. O festival de poesía Kerouac con sede en Vigo nos seus 15 anos de existencia, New York e México bota o pecho tras quince edicións na cidade olívica. Confirmábao onte o seu director, o vigués Marcos de la Fuente.

Facíao poucas horas antes de inaugurar a que será a derradeira edición. Nesa primeira xornada, presentación do seu novo poemario, «El poeta vs la máquina» (Editorial Elvira).

«Son poemas que escribín e démosllos á intelixencia artificial para que elaborara uns gráficos, unhas imaxes, a partir deles. No libro aparecen os poemas e as ilustracións da IA», explicaba Marcos De la Fuente.

En canto á temática, indicaba que o eixo é a relación da arte coa tecnoloxía. «Os poemas retratan unha época concreta, previa á explosión da IA, xa que foron creados no 2021, antes de ChatGPT. Con isto, adiantámonos ao que pasou despois», defende o poeta e director do Kerouac.

Engadía que «intentamos facer a máquina o máis humana posible xa que a alimentamos con poesía. Agora que todo o mundo emprega a IA interésame menos como tema».

Na poesía residirá a parte máis humana das persoas

Marcos de la Fuente

— Poeta

En canto ao papel da poesía nesta nova era, respondeu que «temos que comunicarnos coas máquinas a través da escrita. Canto máis poética sexa a nosa escrita, máis poética será a máquina. Se falamos do papel da poesía nun futuro, penso que será un refuxio. A poesía será a oportunidade de afrontarnos coa nosa faceta máis humana. Na poesía residirá a parte máis humana das persoas».

Respecto dos 15 anos de vida do Kerouac, recoñeceu que «este festival era a nosa carta de amor á cidade de Vigo; é o que nós intentamos darlle; queríamos convertila nunha cidade un pouco máis poética».

Recoñeceu que «cada vez custaba máis organizar o Keroauac. Pensamos que 15 anos está ben. Fixemos un percorrido e aportamos todo o que podiamos aportar. Agora estaremos en novos proxectos e novas cousas. Teñen que vir as novas xeracións para vir con cousas novas. Cando empezamos co Kerouac non había festivais deste tipo en Galicia e practicamente en España. Agora si que hai un montón de cousas», reflexionou De la Fuente.

Desta maneira, o Kerouac ficará na súa historia con 15 edicións; mentres que a edición mexicana asinará o seu final coa novena e a de New York coa décima no mes de maio.

Vigo perde o Kerouac pero a inquedanza de Marcos de la Fuente e Vanesa Álvarez voou este verán para a organización do festival Poetiuses en Ibiza.

Programación do sábado 18 de outubro

O salón de actos do MARCO, Museo de Arte Contemporánea de Vigo, ás 19:30h acolle a xornada central desta edición:

- La Sole & El Hombre Viento: Dende Valencia e Madrid chegan os compoñentes deste potente proxeto. Presentan 3nigma, un traballo que fusiona underground, rap e electrónica con narrativas íntimas e coidadas, expandindo as fronteiras entre xéneros. Será parte da xira presentación do seu novo traballo, moi influenciado pola xa desaparecida artista Gata Cattana.

- Olalla Cociña: poeta galega recoñecida con premios como o Avelina Valladares (2004) e o Fiz Vergara Vilariño (2008). A súa obra explora a memoria, a experiencia feminina e a linguaxe poética como espazo de resistencia.

- Annalisa Marí Pegrum: a poeta e traductora presenta en primicia unha performance multisensorial que recupera a voz da poeta Beat Lenore Kandel e o espírito rebelde do seu mítico e prohibido durante moitos anos, o libro The Love Book, reivindicando a liberdade sexual e espiritual como forza transformadora e de ponderación da muller.

- Alberto Avendaño & Manolo Romón: presentan MOLOTOV, unha proposta híbrida de poesía e multimedia que converte o libro nun obxecto vivo en diálogo coa memoria política e a tecnoloxía. Promete ser unha viaxe no tempo chea de rebelión poética.