Rueda admite que o galego «precisa novas estratexias» para o seu uso entre os mozos, sen «imposicións»

«O pacto pola lingua é posible. Galicia quere ese pacto, Galicia reclama acordos». Son palabras do presidente da Xunta e líder do PPdeG, Alfonso Rueda, este sábado nun acto institucional no Castelo de Mens (Malpica de Bergantiños) previo á celebración do pleno extraordinario da Real Academia Galega , no que pediu aos partidos da oposición que deixaran fóra desde xa «liñas vermellas», así como tamén os «apriorismos».

Rueda admitiu, iso si, que a lingua «precisa novas estratexias» para reverter o descenso do seu uso cotián polos máis novos, tal como amosan os últimos datos do Instituto Galego de Estatística, publicados en outubro, nos que se poñía de manifesto que un terzo dos nenos de máis cinco anos declaraban saber falar «pouco ou nada» en galego. Con todo, o mandatario incidiu en que estes cambios deben levarse a cabo sen «imposicións nin obrigatoriedades», senón que deben ser «amigables» e «positivos», con vontade de «ensinar».

As rúas de Santiago énchense en defensa da lingua: «Teremos futuro en galego»

Tamén en Malpica de Bergantiños estiveron presentes o secretario xeral do PSdeG, José Ramón Gómez Besteiro, e o delegado do Goberno en Galicia, Pedro Blanco. Este último quixo poñer en valor o legado das cantareiras galegas: «Todas elas son fundamentais para dar visibilidade á nosa cultura, á nosa tradición e ao noso pobo».

Besteiro, pola súa banda, denunciou a «falta de vontade política» tanto do PPdeG como da Xunta para «defender» o galego, que pasa por unha «mala situación». Deste xeito, subliñou que «é necesario recuperar» falantes, ao tempo que reivindicou o uso do galego en «todos os lugares»: «Hai que ir máis aló do uso familiar, docente, da vida diaria, do lecer», sinalou. Neste sentido, remarcou que o PSdeG «seguirá apostando» polo seu uso nas institucións «onde se lexisla e exércense os dereitos», como os parlamentos Español e Europeo.

Día das Letras Galegas: os nomes propios da nosa lingua desde 1963

«Pedimos ao PP que deixe de estar en contra do galego»

Pola súa banda, a portavoz nacional do BNG, Ana Pontón, espera que «ese orgullo que vimos reivindicado en todas as cantareiras siga sendo unha base sobre a que construamos o noso futuro». «Existe unha inmensa maioría de xente que sabe que é fundamental que a nosa lingua siga tendo futuro e precisamente por iso estamos aquí», apuntou ao inicio da mobilización celebrada en Santiago, na que estivo acompañada, entre outras, polas deputadas Noa Presas e Mercedes Queixas.

Pontón, que iniciou a súa intervención lembrando a Castelao, sinalou, unha vez máis, que hai un elemento que «debe modificarse de inmediato: o decreto da vergoña», en referencia ao decreto do plurilingüismo, aprobado en 2010 baixo a presidencia de Alberto Núñez Feijóo. «Pedimos ao Partido Popular que deixe de estar en contra do galego e que deixe de estar traballando en contra da lingua propia do país», aseverou a líder nacionalista.