Lívia&Fred, os brasileños que cantan a Martin Codax chegan a Vigo

Escoitar o dúo brasileño Lívia & Fred nas súas actuacións e vídeos no YouTube supón un paseo por diferentes sonoridades onde o traballo vocal resalta. Boa proba é «Noite cheia de estrelas/ Ária Cantilena», a cabalo de Cândido das Neves e VillaLobos; ou a súa interpretación da «Cantiga IV» de Martin Codax. Mañá venres o Museo do Mar na cidade do poeta medieval abrazará a música destes artistas co seu proxecto «Nuvem rósea, chao de estrelas».

A partir das sete da tarde, se poderá gozar coa súa música. A entrada é de balde ata completar aforo. O grupo chega a Vigo cunha longa traxectoria, uns 15 anos de colaboración, con concertos por diferentes continentes.

No seu currículo tamén atesouran premios como o primeiro posto no Gwangju Busking World Cup de Corea do Sur; ou o galardón a Lívia como mellor cantante no Premio Profissionais da Música.

As súas melodías foron convidadas para actuar na Ópera de Damasco en Siria no 2017. Alí se converteron nos primeiros artistas portugueses en actuar naquel palco.

Destacada foi tamén a súa colaboración –que tamén se pode ver no YouTube– coa Orquestra Brasil Jazz Sinfónica.

Alén das liñas máis melódicas, Lívia & Fred tamén gustan da experimentación do jazz máis vangardista. Demostrárono na 21 Edición Encontros Internacionais de Jazz de Coimba este ano.

A crítica destaca a calidade da súa interpretación asís como as «performances arrebatadoras».