O viveiro de empresas de Barro acolle neste mes de decembro tres novas accións formativas para a adaptación das empresas e proxectos emprendedores da provincia ao novo escenario dixital. Deste xeito, "SmartPeme" oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, sempre da man dos propios implicados e implicadas e coa colaboración das asociacións de empresarios e empresarias e de mozos e mozas autónomas.
A primeira cita terá lugar hoxe, ás 17:00 horas, coa acción "Iniciación á impresión 3D: Como funciona e que podo facer". A segunda acción, "Once pautas que debe seguir unha Peme para previr ciber ataques" impartirase o xoves, 13 de decembro, ás 19:00. E xa por último, "Iniciación á Robótica" impartirase o martes 18 de decembro ás 17:00 horas. A oficina "SmartPeme" de Barro atópase no viveiro de empresas do polígono e as inscricións pódense facer no número de teléfono 886 20 20 20, o correo electrónico info.smartpeme@depo.es ou a páxina web www.smartpeme.depo.gal.
Tres liñas
"SmartPeme" desenvolve este ano novas carteiras de servizos co obxectivo de continuar axudando ás empresas da provincia a ser máis competitivas na contorna económica actual. O programa abre tres novas grandes liñas: o "Centro Provincial de Economía Dixital" (CPED), no viveiro de empresas de Barro, "SmartPeme Impulsa" e "TurisTIC".
