14 de octubre de 2018
14.10.2018

Ath-Thurdá pecha hoxe Cantos na Maré

O Museo acolle a proxección do documental "Rosas de Ermera" dentro de Cinemaré

14.10.2018 | 03:14
Actuación de onte da mozambicana Selma Uamusse. // G. Santos

Cantos na Maré achega hoxe o seu derradeiro espectáculo tras unha intensa xornada que onte levou a Xurxo Souto a guiar polos principais espazos da cidade unha visita sonora que rematou no Museo coa actuación do coro Aires da Terra.

Os concertos de Mercedes Peón, Chico César e Os Meninos darán paso hoxe ao espectáculo Ath-Thurdá, promovido polo concello de Évora dentro das accións promocionais para a candidatura desta cidade lusa como Cidade Europea da Cultura en 2027. Dará comezo á 20.00 horas no Pazo da Cultura.

No concerto participarán artistas como Kepa Junkera, alén doutros músicos portugueses como Antonio Bexiga, Beatriz Nunes, Carlos Menezes e Celina da Piedade, entre outros.

Ademais, uniranse outros músicos convidados, como a propia Uxía, directora artística do festival, as Tanxugueiras, o brasileiro Chico César ou a mozambicana Selma Uamusse.

Trátase dun proxecto que xira arredor do cante alentexano, no que tamén participarán Paulo Borges no piano e Raquel Domínguez na gaita.

Cinemaré

O programa de eventos en Cantos na Maré para este domingo tamén inclúe unha nova proxección dentro do ciclo Cinemaré.

No Sexto Edificio do Museo de Pontevedra proxectarase ás 18.30 horas o filme documental "Rosas de Ermera", sobre un tráxico episodio que foi chave na vida do compositor e músico portugués José Afonso, o Zeca Afonso. A película volve sobre os 6 anos nos que a familia do Zeca tivo que vivir separada logo de que os país do creador luso fosen encarcerados en Tímor polo exército invasor xaponés durante a Segunda Guerra Mundial.

A aposta pola incorporación de novas linguaxes, coma a do cinema, ou de xéneros musicais que ata agora non estiveran integrados en Cantos da Maré, como o rap ou o hip hop, forma parte do novo Cantos na Maré, que actualiza o seu formato logo de catorce anos promovendo o intercambio entre artistas e culturas dende Pontevedra e que nesta edición que hoxe chega ao seu fin está a recibir unha importante acollida.

Sen abandonar a idea primixenia da lingua como conexión de Galicia con outras culturas, outros países e outros continentes, Cantos na Maré deu nesta edición un paso máis e tomou unha nova reorientación.

O Festival quixo atravesar máis mares, deixarse alumear por máis lúas e espallarse a máis mundos. Coa música como gran nexo, desde a música de raíz ás músicas urbanas pasando polas voces corais e a polifonía, mais sen renunciar a outros contidos como a gastronomía, a narración oral ou a danza.

Compartir en Twitter
Compartir en Facebook
En estas fiestas, sobran los motivos para beber elaboraciones de vino gallego. En 2018, Galicia firmó la segunda mejor cosecha de su historiay nuestras bodegas despiden el año con un buen balance en todos los sectores