O colexio Sequelo de Marín levará a cabo hoxe a última fase do proxecto bianual do colexio, coordinado polo Equipo de Dinamización Lingüística, "Arredor do Lameira". Este proxecto ten por obxecto poñer en valor o río que circunda o colexio, o Lameira ou Lameiriña, e fomentar o seu coidado e conservación por medio de actividades medioambientais, así como estudar a fauna, a flora e as construcións máis significativas relacionadas co río.
Para concienciar ao alumnado da importancia da conservación do río, planifican as actividades "Voces de Río" e "Conciencia de Río", consistentes na elaboración de poemas e lemas nos que se destaca a importancia que o Lameira ten para a comunidade escolar e para Marín, en xeral.
Hoxe os nenos e as nenas de 1º a 6º darán lectura aos lemas e aos poemas e colocarán unhas plaquiñas nas árbores que fomos catalogando neste curso, situadas á beira do río e no recinto escolar, para que os paseantes poidan identificalas e saber de que especie se trata, como explica Mirta Buceta, coordinadora do Equipo de Dinamización Lingüística.
