Asociacións e colexios participan hoxe no concurso de maios e embarcacións

Os grupos participantes terán, obrigatoriamente, que concentrarse ás 16.30 horas na alameda Rosalía de Castro, no entorno do palco da música, debendo ter presenza polas rúas de Marín e Alameda pola mañán.

Durante a celebración do concurso farase unha homenaxe a Agustín Sanjorje, o participante dos Maios máis maior aínda vivo, pois a súa participación nos Maios data dos anos 30 do século pasado.

O concurso está dirixido a tódolos centros escolares, asociacións e demais colectivos de Marín e bisbarra. Os maios participantes terán forma cónica e na decoración exterior dos maios só se utilizarán elementos vexetais e naturais. As embarcacións só serán de construcción artesanal e as coroas deberán respectar as formas tradicionais dos maios de Marín e estará recubertas con material vexetal. Non se permitirán engadidos de figuras ou outros símbolos non tradicionais.

A valoración dos grupos participantes farase mediante un xurado, nomeado polo Ateneo, que valorará de 1 a 10 puntos, a cada participante, en cada un dos apartados do concurso, puntuación que se fará pública ao remate do concurso. O xurado contará cun secretario do Ateneo e o seu fallo non poderá ser recorrido.

Os apartados do concurso son para os maios Letra, Construcción, Coroa e Interpretación. Para embarcacións serán Letra, Construcción e Interpretación. En cada apartado haberá un primeiro, un segundo e un terceiro premios, poidendo quedar deserto algún deles si o xurado así o considerara. A letra da coplas deberá ser en galego e de libre composición.

Rosca e chocolate

Tódolos grupos recibirán unha axuda polo feito de participar, ademais da tradicional rosca e o chocolate para os seus compoñentes.

Na interpretación, que será de catro estrofas e a última, usaranse as melodías tradicionais tanto no caso dos Maios como das Embarcacións, e o xurado terá en conta, se se dera o caso, a recuperación dalgunha melodía tradicional.

Ademais, dentro desta programación con motivo da festa dos maios tamén se ofreceron charlas didácticas en diversos colexios, O Sequelo, A Laxe, Colexio Inmaculada e Carballal. Estiveron impartidas por Julio Santos Pena e Celso Méndez Fraguas e teñen como finalidade, mostrarlle aos nenos e nenas como se confecciona un maio, os materias que se usan, como se fai unha copla o como se interpreta coa súa melodía.

Unha exposición de fotos dos Maios desde 2006 a 2017 estivo instalada no local do Ateneo, na Rúa do Forno 42, en horario de martes a venres de 18.00 a 20.30 horas e sábado de 11.00 a 13.30 horas.

Ademais o pasado venres celebrouse unha mesa redonda coa participación de José Antonio Pazos mestre do CEIP O Sequelo, Enriqueta Otero "Molas" gran coñecedora dos maios de Marín e Julio Santos Pena, que durante moitos anos foi un dos impulsores da festa dos Maios en Marín.