26 de marzo de 2015
26.03.2015

"Represaliadas e resistentes"

As xornadas comenzan hoxe na Casa das Campás

26.03.2015 | 02:26
Exposición na Ferrería sobre as represaliadas. // Gustavo Santos

A Casa das Campás acolle dende hoxe, 19 horas, las III Xornadas "Represaliadas e resistentes", organizadas pola Concellaría de Patrimonio Histórico, e que teñen como obxectivo dar a coñecer a represión vivida polas mulleres, as máis esquecidas dentro da memoria silenciada.

Nesta primeira sesión haberá unha mesa redonda que abrirá o investigador Xosé Álvarez Castro facendo un repaso ao acontecido na cidade a raíz do golpe de Estado de xullo do 36. Baixo o título "Sobrevivir á represión e á ditadura" falarán tamén dúas mulleres pertencentes a familias represaliadas, Ramona Fariña e María do Carme Lores, que compartirán cos asistentes a súa visión do conflicto. A xornalista Montse Fajardo tamén participará na mesa redonda para falar de historias de outros familiares de asasinados o 12 de novembro como Ramiro Paz, Germán Adrio ou José Adrio, de exiliados como Bibiano Fernández-Osorio Tafall ou de represaliados como os Gama.

As súas historias

A familia de Ramona Fariña foi unha das máis perseguidas do barrio da Moureira. O seu tío, Ricardo Fariña Torres pasou tres anos agochado na cheminea da casa de Faustina, a súa irmá maior, perseguido polos fascistas por ser un dos principais propulsores do asociacionismo mariñeiro. Pepe e Modesto, os dous fillos doutra das irmás de Ricardo, alcumados "Os Torreiros" foron detidos e enviados á illa de San Simón. Tamén en San Simón estivo detido o pai de Ramona, Maximino Domínguez, antes de ser enviado ao famoso penal de San Cristóbal, participando na fuga que tivo lugar o 22 de maio do 1938 da que logrou saír con vida.

O 18 de xullo do 36 Ramona tiña nove anos. Lembra ás patrullas de cívicos e gardas petando na porta, interrogando a Olivia, a súa nai, sobre o paradoiro do irmán e do home. Lembra o silencio, as mentiras, para non desvelar o paradoiro do seu tío Ricardo. As ameazas ás súas curmás de que lles ían rapar o pelo. Os apuros para comer cando todos os homes da familia estaban entre reixas. O medo, cando pasaron semanas sen saber nada do pai fuxido do inferno. Lembranzas que vai compartir cos asistentes ao acto desta tarde.

Mari Carme Lores naceu moito despois de que acabara á guerra. Viviu toda a vida coa súa avoa materna, Isolina Villaverde Cendón, pero xa era adulta cando soubo as circunstancias nas que Isolina perdera ao seu home.

Aurelio Torres era canteiro, anarquista e profundamente anticlerical. Os fascistas asasinárono o 23 de agosto do 36 e abandonaron o seu corpo salvaxemente mutilado na curva de Bora. A súa muller si era relixiosa e quixo facerlle un funeral. O cura dixo que non e Isolina xamais volveu a pisar a igrexa: "Se non é boa para o cadáver do meu home tampouco é boa para min", dixo e xamais nos 86 anos que viviu volveu pisala. Nin para a voda dos fillos.

Enterrou o recordo do seu home baixo un loito eterno que xamais quitou e deslombouse traballando a terra para sacar adiante soa a tres nenos. Como sobreviviu economicamente e rodeada polos asasinos do seu marido. Cales foron os seus acenos de memoria resistente, como condicionou o que sucedeu aos seus fillos, como vive a seguinte xeracións os actos de homenaxe, tan tardíos, aos seus familiares asasinados, son algunhas das cuestións que abordará na Casa das Campás Mari Carme Lores, a neta de Aurelio, o canteiro de Mourente.

As xornadas son gratuítas e non é preciso inscrición previa. Mañán haberá unha conferencia de Montse Dopico: "Semente de mudanzas". As 20 horas proxectarase o documental "La memoria de las olvidadas". O sábado, as 11 horas será á conferencia de Paula Godinho: "Propiedade privada da história e memórias fracas: a esquerda da esquerda e as revoltas da memória". As 11.45 horas será o relatorio de Aurora Rodrigues e Pilar Allegue.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia