13 de marzo de 2019
13.03.2019

O alumno, protagonista da súa aprendizaxe

" O Colexio Plurilingüe Compañía de María vén de estrear Signa, o seu novo modelo pedagóxico

13.03.2019 | 02:27
Alumnos de Secundaria do Compañía de María utilizan plickers. // Cedida

Fundado en Cangas en 1925, o Colexio Plurilingüe Compañía de María pertence a unha rede de 22 colexios de toda España que teñen o compromiso coa educación por bandeira.

O centro vén de estrear un novo modelo pedagóxico, Signa, unha proposta personalizada, na que o alumno é único e irrepetible e o protagonista da súa propia aprendizaxe. A proceso educativo adáptase ás súas necesidades, fortalezas e aspiracións para permitirlle desenvolver todo o seu potencial académico, aspirando tanto á excelencia educativa como persoal.

O colexio é tamén un lugar de aprendizaxe para a vida, onde os valores son fundamentais na formación das persoas e durante todo o proceso educativo, dende Infantil até Secundaria.

No Compañía de María, as aulas convértense en espazos de traballo dinámicos e construtivos onde se promove o diálogo, a equidade e o pensamento crítico. Espazos onde aprender tamén dende a inclusividade (contan con dúas aulas de Educación Especial), a cooperación, o intercambio e o debate continuo.

"Para nós a pedagoxía é o centro da aprendizaxe, axudados sempre polas novidades metodolóxicas (aprendizaxe cooperativa, intelixencias múltiples, matemáticas manipulativas, traballo por proxectos, gamificación, plickers, entornos virtuais...) que mellor se adaptan ao perfil e ás necesidades dos alumnos do século XXI", destacan.

Como colexio plurilingüe, en Infantil contan con dúas horas de inglés á semana. En Primaria utilizan o método interactivo Little Bridge e en Secundaria, enfocan o traballo nas catro destrezas da comunicación para acadar unha acreditación de nivel no marco común europeo (A2, B1 ou B2).

A materia de Plástica impártese nesta lingua, e organizan tamén unha English Week na que se realizan diferentes actividades relacionadas coa lingua e cultura inglesas. Os alumnos de 4º de ESO tamén teñen a posibilidade de viaxar ao Reino Unido e aloxarse durante unha semana con familias locais.

O Compañía de María é, así mesmo, o único centro examinador do Oxford Test of English de todo O Morrazo, probas ás que poden presentarse alumnos de calquera outro colexio ou adultos que o necesiten para os seus estudos universitarios ou traballos.

As ciencias son un área fundamental no currículo do colexio, que tamén fomenta a creación artística e literaria entre os seus alumnos.

Ademais, en todas as etapas educativas, as nenas e nenos traballan técnicas de relaxación para ampliar a súa capacidade de concentración, e contan cun programa de mediación entre iguais, onde alumnos formados resolven os pequenos conflitos e malentendidos que se lles poden presentar diariamente aos seus compañeiros.

Servizos

A vida sá mediante o deporte e a alimentación saudábel e outra área destacada do proxecto educativo dun colexio que dispón dun aula de madrugadores aberta dende as 8.00 e servizo comedor con cociña propia, con estudos vixiados despois de comer para os alumnos de Primaria e ESO. Con tres patios exteriores, aulas dixitalizadas en todos os cursos, salón de actos, biblioteca e laboratorio, entre outros equipamentos, o centro ofrece un amplo abano de actividades extraescolares xestionadas pola Anpa (pintura, ábaco, robótica, zumba, inglés) ou dependentes dos clubs da contorna (fútbol, patinaxe, taekwondo).

Compartir en Twitter
Compartir en Facebook
Comeza un ano máis o Concurso Illas Cíes no que os nenos e nenas de Vigo nos contan como ven eles as Illas Cíes

FaroEduca