"Os faros son como os anxos dos mariñeiros que os levan á terra cando eles non poden voltar pola súa conta, son o seu amparo". Así define o artista cangués Raúl Velloso estas construccións con alma propia que el representa na súa nova colección artística. A exposición recolle a fábrica de Massó, faros, igrexas e personaxes cangueses, entre outros horizontes. É unha homenaxe á historia e vida mariñeira propia de Cangas, o xeito de ser dun pobo eternamente ligado a un mar onde repousan as súas vivencias e lembranzas.
Logo de marcar pegadas recentemente noutros puntos do mundo como Miami, Porto ou Madrid, Raúl Velloso retoma o contacto coa terra natal. "Tocoume estar fóra por moito tempo e sempre tiña ganas de voltar porque é un sitio do que gozo moito, quería repensar cousas de Cangas. Estar aquí é estar na casa". O artista plasma nas súas obras a simboloxía dos lugares que lle atraen a través da potente cor, alegría e movemento que segundo o pintor, son o reflexo da súa personalidade activa. "Son unha persoa que non ten paraxe".
A exposición tamén permite botar unha ollada aos faros espallados polo mundo: Estados Unidos, Nova Zelanda, Canadá, a Bretaña Francesa, o oeste de Irlanda, Noruega ou Muxía son algunhas das súas remotas localizacións. Nun recuncho das paisaxes descóbrese a melancolía e soidade dos fareiros, homes que vivían meses totalmente illados nun mundo cáseque a parte, onde só albiscaban a fronteira entre ceo e mar. Un oficio a piques de desaparecer. "Quedan poucos fareiros como os de antes, só nos países máis nórdicos", apunta Velloso.
Outras creacións do pintor retratan un dos lugares máis significativo de Cangas, a cara visible do mar e do seu pobo: a fábrica de Massó. "Para min é o edificio máis bonito que temos; non existe ningunha familia en Cangas que non teña relación con Massó e por iso o pinto". Un lugar en ruínas polo que Raúl Velloso aínda pasea coa súa cadela Lúa, sempre que pode. "A xente de aquí vén e identifícase coa obra, lembran e reviven momentos pasados nestes lugares e iso é moi bonito".
As raíces de Velloso tamén se atopan ancoradas no mar cangués. Os seus antepasados, o bisavó Guido e o tioavó Pedro Montemerlo foron os primeiros Paganini que chegaron a Cangas coa conserveira.
Agora os seus familiares atópanse a escasos metros do mar nas paredes da Capela do Hospital, lugar que acolle a exposición, mais tamén un dos espazos plasmados no lenzo do artista, co seu trazado de liñas sinuosas tan característico. "É un edificio que ten moita maxia, a súa mestura entre pazo e capela gústame moito", explica. En todo intre procura unha ligazón co mar. "Esta Capela estaba moi preto da auga, era un lugar ao que acudían peregrinos e xentes do mar".
A Torre de Hércules, o pazo de Mugartegui ou a Illa de San Simón e a ría de Vigo, vistas dende o ceo, son algunhas paisaxes ilustradas en láminas polo artista e que poden contemplar ata o vindeiro mércores. E o percorrido non remata aí. Cadros taurinos, retratos da lánguida fazula de Rosalía de Castro, pregoeiros e geishas son outras creacións alternativas que amosa na nova colección Raúl Velloso, un artista que "non cree na inspiración, senón na creación constante".
