21 de noviembre de 2019
21.11.2019

"Ante a violencia machista que non cesa, os CIM mantémonos en loita"

A estradense Margarita de la Calle preside a asociación de Centro de Información á Muller

21.11.2019 | 20:50
Parte de la directiva de Asocim.

No que levamos de ano 51 mulleres foron asasinadas a mans das súas parellas ou exparellas en España, unha cifra que xa supera ao total rexistrado en 2018 (50), segundo as últimas estatísticas da Delegación do Goberno para a Violencia de Xénero; que non contabilizan os crimes machistas cuxo autor non mantivera unha relación sentimental coa vítima.
Estes datos tan só son a última consecuencia dunha problemática social de fondas raíces, que é necesario visibilizar, e que pon de relevo a necesidade de seguir artellando unha rede de atención ás vítimas de violencia de xénero. "Ante a violencia machista que non cesa, os CIM mantémonos en loita", asegura Margarita de la Calle, presidenta de ASOCIM (Asociación de Profesionais dos CIM de Galicia).
Desde o colectivo reclaman reforzar os Centros de Información á Muller con máis persoal e medios ao tratarse do "recurso especializado de primeira man" ao que teñen acceso as mulleres. Unha reivindicación á que se suma a necesidade de aumentar a presenza deste servizo de atención e protección nas zonas rurais e redistribuír os fondos do Pacto de Estado contra a Violencia de Xénero, fixando maiores partidas para as axudas destinadas ás vítimas, tanto en contía como en cobertura temporal, como para aqueles municipios que contan cun CIM; co obxectivo de incentivar a súa creación.
Coa conmemoración do Día Internacional da Eliminación da Violencia contra a Muller, o vindeiro luns 25 de novembro, no horizonte, ASOCIM chama a promover campañas de sensibilización e concienciación que poñan o foco no agresor machista e afonden nas diversas formas que existen de violencia de xénero (psicolóxica, sexual, física, económica). Accións imprescindibles para desactivar, en palabras de Margarita de la Calle "o auxe de ideas retrógradas que pensabamos superadas".

Compartir en Twitter
Compartir en Facebook


Especial Navidad 2019

En estas fiestas, sobran los motivos para brindar con elaboraciones de Galicia, que despiden el año con un gran balance en todos los sentidos