10 de octubre de 2019
10.10.2019

Xosé Neira Vilas, no nome do pai

A Cidade da Cultura acolle a presentación do libro 'Co pai', un conxunto de lembranzas arredor da figura paterna que o literato de Gres deixou escritas antes do seu pasamento

10.10.2019 | 02:41
Vilavedra, García, Redondo e Freixanes, onte, en Santiago. // Xoán Álvarez

Antes do seu pasamento, acontecido en 2015, Xosé Neira Vilas deixou escritos nos que rememora experiencias, traballos e reflexións artelladas arredor da figura do seu pai. Este conxunto de lembranzas ve agora a luz baixo o título Co pai, un libro publicado por Editorial Galaxia que foi presentado onte á tardiña na Cidade da Cultura de Santiago de Compostela, precisamente, no auditorio que leva o nome do autor de Memorias dun neno labrego.

O secretario xeral de Política Lingüística, Valentín García, agradeceu á Fundación Neira Vilas; á editora, Dolores Vilavedra, e a Galaxia, "así como ao propio Pepe, o poder seguir gozando de novos textos do que foi o autor do primeiro best-seller en galego, a través do que tantas persoas descubriron o valor da nosa lingua como idioma literario e de cultura". E valorou "volver atopar esa prosa breve, condensada, aparentemente sinxela en que as anécdotas e lembranzas que semellan intrascendentes nos levan a reflexionar sobre realidades moito máis profundas". Tamén interviñeron na presentación Fernando Redondo Neira, presidente da fundación con sede en Gres, e Víctor Fernández Freixanes, conselleiro da editorial e presidente da Real Academia Galega.

Desta obra de carácter memorialístico cómpre salientar a singular prosa poética do seu autor, que se desprega sobre unha serie de textos breves nos que se xuntan a dimensión narrativa e a lírica. Engádese así este libro póstumo a outros cos que Neira Vilas foi elaborando unha memoria literaria coa que evocar o eido orixinario e os afectos familiares: Lar (1973), evocación da primeira viaxe a Galicia tras 24 anos na emigración; Nai (1980), semblanza da súa nai, Manuela Vilas Arteaga; e Pan (1986), recordo dos anos de infancia e adolescencia. Os tres volumes foron recollidos por Galaxia na obra Charamuscas (1993) e levados de novo ao prelo pola mesma editorial en 2014, co título Lar-Nai-Pan. Agora péchase o círculo memorialístico do literato de Gres coa obra adicada ao pai, Xosé Neira Silva, home de múltiples oficios, como o ten descrito tantas veces o fillo escritor, e que aquí é caracterizado como "carpinteiro de trencha fina".

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia