08 de septiembre de 2019
08.09.2019

Estefanía Taín Surribas: "Metíanse connosco porque non tiñamos unha ruta en Silleda e decidimos creala"

"Esperamos reunir a 100 persoas, xa que contamos con participantes doutras xuntanzas"

08.09.2019 | 03:37
Estefanía Taín, xunto a dous dos seus cabalos. // Bernabé/ Javier Lalín

A comarca de Deza sempre destacou pola súa afección polos cabalos e a celebración de rutas. Unhas xuntanzas nas que a música e o baile tamén son os protagonistas. Con todo, Silleda foi o concello que máis tardou en crear a súa propia asociación de cabaleiros. O domingo 15 terá lugar a súa primeira xuntanza cabalar que organiza a Asociación de Cabaleiros de Silleda, presidida por Estefanía Taín Surribas.

-Por que se animaron a organizar esta primeira xuntanza cabalar en Silleda?

-Nós xa levabamos participando en varias rutas e sempre se metían connosco porque non tiñamos unha xuntanza cabalar en Silleda, entón decidímonos a crear unha. En principio ía ser para antes do verán pero ao final démonos conta de que era mellor esperar, xa que durante esa época é cando máis xuntanzas se realizan. Polo que, finalmente, vai ter lugar o 15 de setembro.

-Cantas persoas forman parte deste proxecto?

-En principio somos un grupo de cinco persoas, xa que para crear este tipo de iniciativas necesitas un mínimo de catro.

-En que vai consistir esta ruta?

-Esta xuntanza consiste nun paseo que terá como punto de inicio Silleda, nun prado que se atopa ao lado do ambulatorio, onde tamén realizaremos a comida posterior. O traxecto recorrerá Negreiros, O Castro, Ponte, Vilar, Trasfontao e volveremos ao punto de saída. A comida está organizada para as 14:00 horas na que poden participar tanto os cabaleiros como calquera outra persoa. Tamén haberá música e sorteos de produtos que nos van regalando as organizacións que colaboran con nós. Ao final tamén é unha maneira de coñecer xente, xa que a parte da comarca de Deza, tamén vén xente de Lugo, Pontevedra, Rianxo e Santiago. Esperamos que todos os que acudan queden satisfeitos para así poder seguir celebrándoa moitos anos máis.

-Cantos participantes están anotados ata o momento?

-A xente xa comezou a inscribirse pero case todo o mundo espera aos últimos días. A ver se damos xuntado entre 100 e 120 persoas. Tamén esperamos que os demais cabaleiros doutras asociacións tamén participen na nosa.

-Na zona de Silleda considera que hai afección polos cabalos?

-Si, si que hai atracción polos cabalos, non só en Silleda, tamén nos arredores. Ademais, hai outra ruta que é a de Laro, que xa se leva realizando tres anos.

-Por que cre que en Silleda nunca se organizou unha ruta de cabalos?

-Fai cinco ou seis anos fixérase unha ruta, pero organizar iniciativas como esta require de moito traballo e tempo. Ademais, ti o resto do ano tamén tés que ir ás outras rutas para que os demais cabaleiros participen despois na túa.

-Cantos cabalos ten? Con cal participará na ruta?

-Na miña casa temos cinco cabalos, aínda que sempre nos gustaron, nunca ninguén comprara un ata que o fixen eu, xa fai dez anos. Tamén é necesario ter un espazo amplo onde poder gardalos. Na ruta eu participarei cun trotón español, chámase Gitano e xa levo con el ano e medio.

-Cales adoitan ser as razas máis habituais na zona?

-Hai bastante variedade pero, normalmente, os máis habituais adoitan ser españois, árabes, cruces ou trotóns. Nesta zona non hai un cabalo en concreto, depende dos gustos.

-A equipación e a montura teñen un prezo elevado? E os cabalos?

-Depende de cal elixas. Hai prezos asequibles pero, en xeral, a equipación e a montura adoitan ser cara. En canto aos cabalos, tamén varía segundo a raza e o animal que elixas: pura sangue, pura raza, os anos que teña, se é un potro ou un cabalo que xa está montado...Os animais máis habituais da zona roldan entre os 1.000 e 3.000 euros.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia