16 de agosto de 2019
16.08.2019

Stephy Llaryora Arana: "A obra é unha crítica dos preceptos sociais que temos que seguir as mulleres"

"É moi difícil conseguir que algunha das artes escénicas sexa a túa profesión"

16.08.2019 | 03:55
Stephy Llaryora, durante unha actuación teatral da súa xira.

A programación do Verán Cultural impulsado polo Concello de Rodeiro segue o seu transcurso. Hoxe pola noite, ás 20:00 horas, contarán coa participación da monologuista Stephy Llaryora. Eu quero ser galega é o nome que recibe o seu espectáculo, co que busca mostrar o punto de vista da protagonista que, procedente de Madrid, chega a Galicia e decátase de que ela tamén quere formar parte desa cultura.

-Por que elixiu Eu quero ser galega como título do seu espectáculo?

-Elexino porque eu non son galega e viñen vivir para aquí fai catro anos. Na obra mostro a miña adaptación á cultura de Galicia, dun xeito cómico vou dando a coñecer todo o que fun descubrindo dende a miña chegada a estas terras.

-En que consistirá a actuación que vai ofrecer hoxe en Rodeiro?

-O monólogo trata sobre as miñas orixes. Decidín xuntar dúas pezas na que a primeira parte é en castelán e dura aproximadamente media hora. A protagonista é vasca e mostra súa opinión sobre a cultura galega. Tamén é unha crítica cómica dos preceptos sociais que temos que seguir as mulleres chegadas a unha determinada época das nosas vidas. A segunda parte tamén ten unha duración de media hora e é en galego, nela represento a unha persoa que se considera galega pero que provén doutra cidade e, pouco a pouco, dase conta de que ela tamén quere formar parte desa cultura.

-É a primeira vez que actúa na comarca de Deza?

-Fai varios anos actuara nun bar en Lalín como monologuista pero dende que estamos de xira coa productora De Ste Xeito, non demos ningún espectáculo pola zona.

-Na actualidade, tamén participa noutro traballo que se chama Loló&Mamá. De que trata?

-Despois de facer durante varios anos monólogos decidín, fai dous anos, crear a miña propia produtora De Ste Xeito. A obra de Loló&Mamá conta a historia dunha nai e dunha filla que, ao comezo, teñen os roles cambiados. Vese como chegada a unha determinada idade, moitos fillos teñen que coidar das súas nais. Na obra, a proxenitora foi durante varios anos reporteira de guerra e volta a casa da súa filla xa que se atopa nun momento de debilidade.

-Está tendo moitas contratacións durante a temporada estival?

-No caso das pezas teatrais, temos menos actuacións durante o verán xa que a temporada forte comeza no mes de setembro ata decembro. Sen embargo, como eu tamén son monologuista si que teño bastante traballo durante o verán. Os espectáculos de humor funcionan moi ben durante esta tempada.

-Sempre tivo claro que quería adicarse ás artes escénicas?

-No meu caso foi algo vocacional dende moi nova, nas reunións familiares xa me gustaba contar contos ou historias que inventaba eu. Aos dez anos,comecei a acudir a clases de danza e, de seguido, xa me adentrei no teatro, ata que descubrín que podía dedicarme a isto de maneira profesional. Así que, trasladeime a Madrid para estudar a carreira de arte dramático.

-É complicado conseguir vivir desta profesión?

-A verdade é que si, é difícil conseguir que esta sexa a túa profesión porque sempre estás dependendo de que che xurdan actuacións. Por iso, eu preferín crear a miña propia produtora e poder escoller eu o que contar. Para vivir disto, tes que traballar moito e ter,ademais dun perfil artística, coñecementos administrativos e comerciais.

Compartir en Twitter
Compartir en Facebook


Especial Navidad 2019

En estas fiestas, sobran los motivos para brindar con elaboraciones de Galicia, que despiden el año con un gran balance en todos los sentidos