14 de julio de 2019
14.07.2019

Natalia Fondevila López: "Quería crear algo distinto, que a xente valorase a repostería caseira e o café ecolóxico"

"Non quería que a cafetería levase o meu nome e xurdiu Cuppedia, un logo do Reino Unido que significa caramelo e confitura en latín"

14.07.2019 | 03:16
Natalia Fondevila no interior da cafetería. //Bernabé/Ana Agra

Aínda que rematase a carreira universitaria de Tradución na Universidade de Vigo, Natalia Fondevila estaba convencida de que esa non era a profesión que quería desempeñar. Os seus gustos pola respostería e máis a cociña plásmanse na nova cafetería que acaba de abrir en Silleda. Cuppedia, termo que ten á súa orixe no latín , é o nome que recibe este local e que destaca pola súa decoración, os seus produtos caseiros e o café ecolóxico.

-Como xorde a idea de crear esta cafetería? Contou con axuda?

-Principalmente porque eu estudiei Tradución, e non me facía ilusión traballar diso. Realmente, a min o que me gusta é cociñar, sobre todo, a repostería. Ademais, considero que se me dá bastante ben, ou polo menos é o que me din. Pouco a pouco comecei a ter encargos da familia e amigos, polo que decidín crear esta cafetería. Tamén me encanta o café, entón buscaba unir ambas cousas. Aquí, en Silleda, creo que non hai nada parecido, quería crear un local distinto, xa que bares hai moitos e que, ao mesmo tempo, a xente valorase a repostería caseira e o café ecolóxico. No tocante ás axudas, a idea principal da repostería e o café foi miña e inspireime noutras cafeterías das grandes cidades como Santiago, Madrid ou Barcelona, nas cales podías tomar un café e pedir un trozo de tarta. A zona infantil que temos dentro do local foi unha colaboración con outras rapazas, xa que buscabamos un espazo no cal, mentres que os pais e nais tomaban un café tranquilamente, os fillos puidesen estar entretidos. E este local reúne as condicións óptimas para iso. No interior tamén hai unha pequena terraza que está moi ben agora para o verán.

-Chama a atención o nome de Cuppedia. De onde provén?

-Este nome é un logo dunhas cafeterías do Reino Unido. A palabra cuppedia provén do latín e significa confitura, caramelo. Eu non quería que o local levase o meu nome, polo que contratamos ás rapazas de Hydra Marketing para que nos axudasen con iso e co deseño interno do logo. Tamén diseñaron o interior do propio local e, a verdade, esta é unha das cousas que máis destaca a xente que vén.

-Empregan cafe ecolóxico e produtos artesanos. Cal é a súa procedencia?

-A miña prioridade é que, a parte de que sexan produtos ecolóxicos, tamén sexan produtos de cercanía, con provedores que estean a poucos quilómetros de Silleda. O café é Candelas, que provén de Lugo, o leite é de Kalekói, preto de Lalín, a mantequilla tamén é do mesmo lugar, e a fariña, de Silleda. Entón busco produtos locais ou galegos xa que ao final, o ecoloxismo está ben pero se o tes que traer dende lonxe, non che acaba saíndo rendible económicamente. E, por suposto, que sexan produtos de calidade.

-É vostede a única encargada deste local ou conta coa axuda de máis xente?

-Normalmente son eu a única encargada, aínda que tamén conto coa axuda da miña nai, que vén nos momentos de máis traballo para axudarme cos pinchos. Ademais, temos unha camareira polas mañás.

-Cales son os produtos máis demandados pola xente?

-Co café poñemos unha galleta de mantequilla e despois pasamos unha bandexa co que hai ese día, que pode ser biscoito de chocolate, de iogur, tarta de nata, de queixo... E despois o que máis se encarga para levar é unha tarta de nutella, a de queixo e o flan de chocolate. Despois para acompañar o café, polo xeral, gusta todo, aínda que o biscoito de iogur, que é un clásico de sempre, é o que máis se demanda.

-Está satisfeita coa acollida que lle está dando a xente con esta nova iniciativa?

-Si, eu estou moi contenta coa aceptación que estou tendo entre a xente. Tiña dúbidas, xa que eu nunca traballara neste sector e entón nunca sabes, pero a verdade é que moi ben. A xente, polo xeral, destaca a decoración do sitio porque antes era un local diferente, bastante escuro, que tiña un vinilo na cristaleira e a xente agora agradece ter vistas cara a rúa.Ademais, o café gusta moito e xa temos clientes que veñen todos os días a propósito por tomalo. En relación á repostería, a xente queda impresionada cando ven as bandexas coas tartas e biscoitos, todo ben cortado e caseiro. Case todo o mundo colle un anaco, así que iso é un bo sinal, eu creo.

-Tamén se poden facer pedidos para levar para a casa?

-Si, tanto doce como salado. Tamén facemos tortillas e empanadas, e están tendo unha boa aceptación, sobre todo agora que comeza a época das festas. Pero tampouco podo atender un elevado número de pedidos, pois, ao estar comezando, non teño a capacidade nin os medios que pode ter unha pastelería.

-Ten pensado engadir algunha novidade, vendo os bos resutados que están acadando?

-De momento seguir así e coller ritmo, xa que tamén temos algún aniversario e ao ser poucos tampouco podemos abarcar máis do que podemos facer ben. Durante o verán centrarémonos nos aniversarios, nos encargos das festas e no día a día na cafetería,e eu creo que será suficiente. Temos a idea de organizar algún espectáculo de maxia ou xogos con animadores para os nenos pero aínda non temos fixado ningunha data. Sobre todo, serán actividades dirixidas aos máis pequenos.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia