18 de mayo de 2019
18.05.2019

Fala galego, que non che dea medo!

Deza concéntrase para defender a lingua galega e celebra actos musicais para conmemorar o 17 de maio

18.05.2019 | 06:15

A lingua galega é cada ano a gran protagonista do festivo do 17 de maio, unha xornada aínda necesaria porque queda moito camiño por andar para que o noso idioma ocupe o lugar que merece. Onte foron moitos os actos reivindicativos por toda Galicia e a comarca dezana tamén se sumou cunha concentración en Lalín e con actos, en especiais musicais, polo resto dos municipios. Este ano este día tan especial dedicóuselle ao antropólogo, historiador e xeógrafo Antón Fraguas Fraguas, nado en Cotobade, unha persoa que durante gran parte da súa vida recolleu e coñeceu a riqueza da lingua e da cultura galegas.

A súa lingua é unha das riquezas máis grandes que ten un pobo. Onte Galicia volveu saír á rúa como cada 17 de maio para conmemorar o Día das Letras Galegas e para reivindicar o lugar que merece o seu idioma. Tamén a comarca dezana se uniu a esta loita con diversos actos. En Lalín a Asociación A Grela do Deza, xunto coa plataforma Queremos Galego, convocou ao mediodía unha concentración a prol da lingua galega. Este acto completouse cunha obra de teatro e no caso de Silleda e Rodeiro a música foi a aliada para recordar esta data.

Con carteis con frases como Eu amo o galego, eu éntroche en galego, que non che coma a lingua o gato, eu son orixinal falo en galego ou eu amo o ensino en galego, os dezanos concentráronse na carpa situada na Praza da Igrexa para reivindicar e defender o uso do galego. Aproveitouse a ocasión para facer un recorrido pola situación na que se atopa hoxe en día o seu uso, algo do que aínda queda moito camiño por andar, recordouse a figura de Antón Fraguas, a quen se lle dedicou este ano este día tan especial, e leron fragmentos da súa obra. Ariadna Fernández, que preside o colectivo A Grela, foi a encargada de ler o manifesto baixo o lema: Máis que nunca queremos galego. No mesmo abordouse a situación "crítica" da nosa lingua mais falouse de que a situación aínda pode mellorar se "se se comeza por recoñecer o dereito a ser lingua visíbel, audíbel, e practicábel sempre, a respirar libremente en todos os espazos". Un dos grandes problemas é que o 22,7% das persoas de catro a 15 anos non saben falar galego, tal e como sinalan desde Queremos Galego "porque existen límites de todo tipo, tamén legais, para empregalo con normalidade". O manifesto rematou demandando liberdade, igualdade e xustiza para o galego porque "máis que nunca queremos galego en todas as comarcas, en todos os concellos e en todo e para todo". Tras rematar a lectura Ariadna Fernández animou a todos a facer todo en galego: amar, durmir, soñar, estudar, traballar, educar, medrar... "porque o galego é noso e nós temos a razón con el". Os actos das letras continuaron en Lalín pola tarde con espectáculo Procura-se Pepa a Loba, de A Cova das Letras.

Mentres en Silleda, celebrouse o IX Festival de Música Tradicional do Concello de Silleda coa actuación de varias agrupacións e en Rodeiro o XII Festival das Letras Galegas co ritmo da coral polifónica da localidade. Hoxe, ás 19:00 horas na carpa da Praza da Igrexa de Lalín, será o III Serán das Letras Galegas.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia