30 de abril de 2019
30.04.2019
Faro de Vigo

San Xurxo bendice as varas do gando en Cristimil

A poxa da carne que ofrecen os devotos e as estampas axudan a pagar a festa

30.04.2019 | 02:41

Esta fin de semana os veciños de Cristimil celebraron a súa tradicional festa do San Xurxo, o patrón da parroquia. Na xornada dominical, logo de dúas rezadas, houbo misa solemne e procesión coas imaxes do santo e da Virxe do Rosario e, ao remate, os ramistas puxeron á venda as varas bendicidas, que os devotos dende tempos remotos mercaban para afalarenlle ás vacas e agora serven para manter aos malos espíritos afastados das casas e tamén dos coches e tractores.

Os fieis levaron máis de 500 varas benditas e outras tantas estampas deixando a cambio unha esmola, que, xunto coas pezas de porco que trouxeron algúns para ofrecerllas ao santo, axudan a pagar a festa logo de seren adxudicadas en poxa antes do concerto que ofreceu a Banda de Música Vilatuxe. Houbo quen "pasou a vara" ao San Xurxo, ritual que vai a menos dende os anos setenta cando o cura, logo de que se pintara o santo e o retablo, prohibira refregar a vara á imaxe como viña sendo tradición.

Os tres entusiastas veciños que repetían como ramistas acordaron nesta ocasión levar a festa do campo de Mato a un novo recinto a pé da igrexa, nunha pradería onde instalaron a carpa, na que de véspera houbo unha cea popular de empanada, torresmos, churrasco e pan e viño en abundancia para rematar cunha verbena amenizada pola orquestra Foliada e o trío Máster.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia