16 de marzo de 2019
16.03.2019

A nova campaña de escavación do Castro de Doade arrancará o vindeiro 13 de maio

Buscarán un terceiro foxo e maila entrada e consolidarán as estruturas habitacionais

16.03.2019 | 02:30
Manuel Blanco, con David Fernández Abella e Fátima Sánchez Blanco.

A nova campaña de excavación do Castro de Doade comezará o 13 de maio e contará cunha equipa internacional integrada por arqueólogos e estudantes do Mestrado de Arqueoloxía e Ciencias da Antigüidade da Universidade de Santiago de Compostela (USC), que unha vez máis realizarán as prácticas finais do mesmo neste castro, e tamén estudantes estranxeiros, atraídos polo interese que suscita o xacemento dentro de comunidade científica.

Constará de varias fases: unha primeira de escavación de tres novas sondaxes, unha no antecastro para a localización dun posible terceiro foxo, detectado polo xeorradar, outra na zona oeste da muralla, para localizar a entrada orixinal ao recinto castrexo, e unha terceira na zona habitacional, lindeira coa parte do poboado xa descuberta e consolidada, coa finalidade de ampliala.

A segunda fase será na consolidación das estruturas habitacionais descubertas na zona de escavación en área do poboado castrexo da coroa do castro, a protección e tapado das catas do antecastro e da muralla, así como a restauración, limpeza, siglado, estudo e catalogación dos restos arqueolóxicos mobles, que pasarán a engrosar o relevante contido das vitrinas da sala de arqueoloxía do Museo Etnográfico Casa do Patrón, monotemática deste xacemento.

Levarase a cabo unha terceira fase, que consisitirá na valorización e promoción turística do castro e a súa contorna, mediante paneis turísticos informativos; visitas ás escavacións guiadas polos propios arqueólogos, durante a súa execución e posteriormente ás estruturas localizadas, que permanecerán visitables todo o ano, de xeito gratuíto; deseño e maquetación dunha Unidade Didáctica de Arqueoloxía, que se utilizará como soporte teórico das visitas; deseño, maquetación e posta en marcha dunha moderna páxina web específica do Castro de Doade e da súa contorna, que conterá amplia información sobre o castro, a réplica da casa castrexa, os obradoiros e a sala de arqueoloxía do museo, a ruta homologada de sendeirismo do Castro de Doade (PR-G210); e, cara a finais de ano, un congreso de arqueoloxía de dúas xornadas, que culminará coa presentación do libro científico O Castro de Doade: unha fortificación da Idade do Ferro, no corazón do Deza.

Compartir en Twitter
Compartir en Facebook

Noticias relacionadas

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia