06 de febrero de 2019
06.02.2019

Marcos Calveiro sementa conciencia ecolóxica entre os alumnos do Golmar

O escritor arousán estrea o Faro da Escola en Deza - Alerta de que "nuns anos o cen por cen das aves morrerán empachadas de plástico", como xa está a pasar coa fauna mariña

06.02.2019 | 02:20

"Un forte alcatreo converte o aire nunha substancia mesta, case irrespirable. Un vertedoiro infindo. Un futuro incerto. Mírese por onde se mire hai trebellos de todo tipo: mobles estragados, pneumáticos usados, colchóns vellos, peluches orfos, bonecas mutiladas... De socate, dun frigorífico abandonado, ábrese unha das portas, e do seu interior xorde a cabeza dun neno cuns auriculares amarelos nas orellas". Así se describe a aventura que o escritor arousán conta na súa novela Unha casiña branca, que primeiramente ía ser unha obra teatral, tal e como confesou onte o propio autor ao alumnado de 4º de Primaria do colexio Xesús Golmar, de Lalín. Esta actividade forma parte do programa Faro da Escola e este centro educativo é o primeiro de Deza que participa.

Nestas 128 páxinas o autor relata unha historia que esperta a conciencia dos máis pequenos, xa que relata as consecuencias que ten que no día a día as persoas pasemos por alto a reciclaxe. "Vivimos nun mundo de lixo, onde gran parte se acumula nos vertedoiros, pero aquí non é un problema moi grave, porque temos colectores, un camión de lixo que o recolle... o gran problema está noutros países de Asia, América ou África". Así introduciu a súa charla Marcos Calveiro, que con diapositivas con imaxes foilles contando a realidade doutros mundos nos que viven e viven de lixo. "Persoas que viven así como as da novela, porque isto é unha realidade, eles chámanlles tiradeiros, porque é onde tiran as cousas, e aquí hai lixo bo é malo, e todos pelexan por obter o mellor". Cando o escritor lles explicou que poden haber vertedoiros con moreas de lixo tan grandes como as cidades de Vigo e A Coruña, o alumnado quedou abraiado. Mesmo, Calveiro lles mencionou a outra realidade que temos aquí, á volta da esquina. "En menor escala isto tamén pasa nas grandes cidades, que é común de noite ver xente rebuscando nos colectores, sobre todo ,aqueles próximos a supermercados, porque tírase comida, aínda que algúns xa deciden doala aos bancos de alimentos".

O autor explicoulles as consecuencias que acarrea o lixo. "Aínda que hai un tratado internacional que obriga a cada país a facerse cargo do seu lixo, e que este quede en cada territorio, isto incúmprese". Faloulles do caso dos ordenadores vellos que moitas veces acaban en Asia ou África e "son moi contaminantes e nestes países contaminan os ríos e acaban prexudicando á auga potable e tamén afecta á respiración de grandes e pequenos". Ante isto o escritor referiuse ás veces que seguramente eles, os nenos, se enfandan polos deberes, por non ter o modelo de móbil que queren... concienciándoos que " non sabedes que sodes uns auténticos privilexiados".

Outras das consecuencias das que lles falou foi da mortaldade de fauna mariña e tamén das aves que se alimentan dela. Nunha foto puideron ver unha gaivota que no estómago tiña cantidade de lixo como tapóns ou a regleta dun enchufe. "Nuns anos o 100% das aves terán lixo no bandullo e morrerán por empacharse de plástico". Por iso, Calveiro recalcoulles a importancia de reciclar. "Eu na cafetería que teño o mobiliario é todo reciclado, por iso non hai unha cadeira igual, fómolas recollendo dos colectores e reparándoas e que a xente no sabe o valor que ten e o bonito que é o que tiran" e todo isto para explicarlles que "toda esta preocupación" lle levou a escribir este libro e que el sempre aposta por finais abertos.

Compartir en Twitter
Compartir en Facebook

Noticias relacionadas

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia