12 de agosto de 2018
12.08.2018

"Empecei con cinco anos a cantar os reponsos na misa"

12.08.2018 | 03:30

-Teño oído que vostede lle dá moi ben á música.

– A miña nai xa era cantora. E eu toco a trompeta e fun un dos fundadores da banda de Agolada. Estiven na municipal de Redondela, bueno nunhas 15 bandas, tamén en grupos, en corais e cando tiña 12 ou 13 anos tiñamos un conxunto aquí en Ventosa dunhas voces extraordinarias. Había un que se chamaba Clemente, que tocaba a trompeta e que en Cuba fora sarxento, e ensaiábanos el. Aínda que realmente cando empecei a cantar tiña cinco anos e foi na capela de aquí. Tiña un tío mestre, don Jesús, o chamado mestre de Agolada, que de feito, o consistorio estaba en Borraxeiros e foi el quen o trouxo para Agolada, aínda que despois volvéronllo levar e outra vez volveuno traer. Antes os sábados había escola, cando non había era os xoves, e pola tarde,el aproveitaba para facernos instrución, cantar... Era un home moi progresista. Tiña mal xenio, pero con el as cousas andaban ben.

- Pero por que foi o seu debut nunha capela?

- Había un cura de Ventosa, que lle chamaban o Casanova e era tatexo, el comía aquí na casa e escoitoume cantar e díxolle a meu tío que me preparaba para cantar os responsos. E como o meu tío mandaba máis có meu pai, houbo que facelo. Cando cheguei á misa, deume entrada o cura, empecei a cantar e a xente quedou admirada, porque ver alí arriba un neniño de cinco anos..., e non aplaudiron porque non era o lugar. Aí xa empezou todo e digamos que todo foi pola que xa era miña nai. A ela levábaa seu pai nunha besta para ir cantar aos bautizos, comuñóns, casamentos... Ao mellor ía uns cinco quilómetros na besta.

- En Agolada a xente nova sigue coa tradición das bandas.

- Si, aínda que tocar supón moito, porque tés que ensaiar, ir tocar e non ganas nada. Eu por que toco? Porque me gusta e fágoo todos os días porque no meu instrumento é necesario. Xa dicía o meu profesor: "Un día sen tocar es un suicidio, y dos es la muerte". O do beizo hai que exercitalo tódolos días, porque as notas dalas ti aquí no beizo.

Compartir en Twitter
Compartir en Facebook

GALICIA EN VINOS

Galicia en Vinos

Todos los vinos de Galicia

Consulta aquí todos los vinos de las cinco denominaciones de origen de Galicia