Un centro educativo con poucas matrículas de alumnos pode converterse nunha excelente oportunidade para que os estudantes de diferentes niveis aprendan valores como o traballo en equipo ou a comunicación interxeracional. Un bo exemplo disto é o CEIP Pío Cabanillas, de Dozón. Os seus 27 alumnos e o profesorado puxo en marcha neste curso que está a piques de concluir o proxecto No bico un cantar. Este nome fai referencia ao último verso do poema que compuxo Manuel Curros Enríquez con motivo do pasamento de Rosalía de Castro, en 1885. E é que a escritora do Rexurdimento protagonizou varias horas de aula dos alumnos: uns grupos encargáronse de elaborar un dossier, outros prepararon un power point sobre a vida e obra da literata, uns terceiros asumiron as tarefas de buscar material para editar un vídeo. Precisamente, en dous vídeos que poden verse na canle Youtube recóllese parte deste traballo: No bico un cantar ofrece imaxes dos alumos de primeiro e segundo curso en diversas estancias do colexio, mentres traballan a figura de Rosalía, e en Homenaxe a Rosalía aparecen case todos os estudantes do centro recitando poemas na casa da escritora en Padrón.
Non será, seguramente, o único proxecto no que traballe en conxunto toda a comunidade educativa do colexio de Dozón. O centro dispón, ademais, dun sitio web e do blog Anosavoz.blogspot.es, que dalgunha maneira substitúe a o xornal que antano se publicaba no centro. O colexio, días atrás, tamén recibiu a visita dun grupo de expertos en fomentar a lectura entre as idades máis novas. Xa cara finais de curso, o día 15 haberá unha sesión de inchables para saudar a chegada das vacacións, pagados pola ANPA.
