A inauguración do tradicional mercado navideño de Lalín conta este ano coa celebración dun acto titulado A lingua no padal, en galego con sumo gusto, organizado pola Irmandade Galega de Agropecuarios e Adegueiros do Foro Enrique Peinador, no que se presentarán produtos e marcas dunha ducia de empresas que desenvolven as súas actividades en lingua galega. "É unha iniciativa que xa se fixo noutros concellos, e tras unha mesa redonda en Bueu, onde participou Embutidos Lalinense, eu lles propuxen que Lalín podería ser un sitio interesante para facer este tipo de actividade", explica Cruz López, deseñadora de xoias e responsable da área de comunicación de Embutidos Lalinense.

O evento terá lugar o domingo, ás 12.30 horas, nunha carpa montada na Praza da Igrexa de Lalín e rematará cunha mesa redonda coa presenza de membros das empresas participantes no encontro. Na cita lalinense estarán Galletas Daveiga, Adega Terra de Asorei, Kalekói, Cooperativa Hoxe, Deleite, El Molino del Abuelo, Embutidos Lalinense, Vermú Petroni, Adegas Roandi y Mel e Requeixo das Neves. A metade das firmas presentes desenvolven o seu labor na comarca de Deza nunha cita na que Cruz López foi a encargada de "votar unha man, buscar o espazo e darlle a difusión necesaria", tal e como lembra a lalinense. López tamén lembra que o obxectivo é "poñer en valor a lingua galega como unha lingua que é totalmente válida para o mundo da empresa e tamén para o mundo dos negocios".

A ideóloga do acto deste domingo engade que "moitas veces asociamos o galego as relacións sociais ao ámbito familiar ou a cultura, pero o galego tamén é unha lingua que pode estar presente nas relacións comerciais". Cruz López pensa que "neste caso hai empresas que, non é que non queiran e que no estean predispostas, simplemente que nunca se pararon a pensar en que etiquetar na súa lingua é igual de válido, e incluso lle pode aportar un valor engadido, á hora de comercializar sus productos". A deseñadora de xoias e responsable de comunicación de Embutidos Lalinense está convencida de que "se poden dar pasos nas redes sociais ou nas páxinas web, nos correos electrónicos e nas relacións externas das empresas incorporando o galego pouco a pouco ao catálogo que teña cada empresa porque é unha decisión totalmente voluntaria e libre".

A importancia de etiquetar en galego no eido empresarial é algo que ten que ser independente dun feito que suliña Cruz López: "Na empresa prima o compoñente económico, pero neste caso non está reñido coa visibilidade de galego á hora de comercializar os productos". López suliña, ademais, que a comarca dezá é pioneira nesta normalización lingüística do etiquetado de productos empresariais. "Na comarca de Deza hai un montón de empresas que sí que apostan polo galego á hora de comercializar o que fan, e son empresas novas como pode ser Kalekói ou cooperativas como Hoxe que nunca se plantexaron comercializar os seus productos nunha lingua que non fose o galego".

Comercio exterior

Cruz López explica que o encontro do domingo en Lalín servirá tamén para coñecer "experiencias de empresas que están traballando fora de Galicia como é o caso das adegas que etiquetan en galego e están vendendo os seus viños en Estados Unidos, e non significa o galego un handicap á hora de comercializar ese viño porque ten o valor engadido de que está nunha lingua vencellada a unha parte de España na que a calidade da uva, o clima e demais fan que ese viño teña ese valor". A mesa redonda de Lalín, que tiña concertadas oito empresas, ampliou a dez o número de presentes destacando a presenza de Adegas Roandi da provincia de Ourense, que virá a Lalín a presentar un viño espumoso. Cruz López e os membros do Foro Enrique Peinador confían en que o acto sirva para visibilizar un novo xeito de traballar a prol da normalización da lingua galega.